رحاب الجمل عن كواليس احكي يا شهرزاد: دخلت الكاستينج شكلي بشع ويسري نصر الله أعجب بيا
كشفت الفنانة رحاب الجمل كواليس مشاركتها في فيلم إحكي يا شهرزاد بطولة منى زكي ومحمود حميدة وإخراج يسري نصر الله وتأليف وحيد حامد.
وقالت رحاب الحمل في تصريحات إذاعية: كنت في الشركة المنتجة بالصدفة علشان مسلسل ولقيت زحمة ويسري نصر الله بيعمل كاستينج قالوا لي تعرفيه قلت لهم أه طبعا بحب له فيلم مرسيدس فاقترحوا عليا ادخل الكاستنيج وقابلته بالصدفة وما كنتش حاطة ميكب وشعري كيرلي ومش مستعدة وشكلي كان بشع واكتشفت أنه عاوز الشكل ده وبيحب الناس على طبيعتها من غير ميكب ورشحني أعمل مشهدين هما صديقة منى زكي في الجيم أو الدكتورة اللي بتعمل إجهاض ولكني طلبت منهم أخذ الورق فوافقوا لما قريته وذاكرته كنت منبهرة.
وأضافت رحاب الجمل: وأنا في البروفا بالصدفة كان يسري ومنى زكي بيعملوا بروفات وكنت بقول معاهم لقيت يسري بيقول لي أنت حافظة الدور وقال لي اعملي بروفا مع منى زكي، وقعدت جمب منى لقيتها سابت نفسها وبصت ليسري وليا وهي فرحانة بيا وأظهرت إعجابها بيا وشفت الأمان في عينها، وحمستني وبقيت أجتهد أكتر خاصة أن ده الماستر سين بتاع الفيلم كله ويسري طلب كاميرا وصور المشهد تاني وقال لي قومي يا صفاء وغير العقد لدور صفاء وحسيت أني في حلم.
وأكملت رحاب الجمل: جالي مكالمات كتير من نجوم كبار ومن ممدوح الليثي ونادية الجندي حضتني في العرض الخاص وكنت مذهولة ولبلبة كلمتني.
وأكدت رحاب الجمل أنها لا تستطيع تجسيد السيرة الذاتية للفنانة لبلبة قائلة: محدش يعرف يجسد دورها في حاجة وأنا ما أجرؤش أعمل كده ولا حد يجرؤ وما ينفعش حد يقرب من المنطقة دي ولا حد عاقل يعمل كده.
وعن رأيها في محمد رمضان وكواليس التعاون معه في إحكي يا شهرزاد قالت: بقول سبحان الله لكل مجتهد نصيب هو مجتهد شاطر وحلم حلم ومشي وجري ورا حلمه وربنا كمله التعب بالنجاح ومن نجاح لنجاح أكبر ومحمد أخويا.
