هالة فاخر: استغربت من اختياري للمشاركة في فيلم أبو نسب.. واختار أعمالي على حسب المخرج
كشفت الفنانة هالة فاخر، عن مشاركتها في فيلم أبو نسب، بجانب الحديث عن معايير اختيارها لأعمالها الفنية.
تحدثت هالة فاخر في تصريحات تلفزيونية، عن معايير اختيار أدوارها، قائلة: بختار الأعمال على حسب المخرج مين لو حسيت إن المخرج هيضيفلي حاجة هعملها، حتى لو دور صغير ومفيش حاجة اسمها ممثل صغير وممثل كبير، والمخرج هو اللي بيساعدك إنك تطلع من الأدوار الصغيرة دي دور تفتخر إنك اشتغلت مع المخرج ده.
وأضافت هالة فاخر: هناك مخرجين كويسين جدًا بس معندهمش توجيه للمثل، أنا مبحبش أشتغل من دماغي لأن التمثيل مسؤلية كل ممثل، وبيغريني اسم المخرج ثم الورق لو لقيت الشخصية ليها حاجة معينة بتوصلها أنا بعمل الدورعلى طول.
وعن مشاركتها في فيلم أبو نسب، أضافت هالة فاخر: أنا استغربت جدًا اختياري للدور، بس أول ما قالوا رامي إمام وافقت على طول وهو دور مختلف عليا شوية، لكن أنا حبيت الدور جدًا.
وأضافت هالة: شاركت قدام عملاق زي ماجد الكدواني وأتشرفت جدًا إني اشتغلت معاه ومكنش أول مرة أشتغل معاه، وكمان ياسمين صبري قمه في اللطافة والحلاوة والشياكة وكل حاجة حلوة.
واستكملت: أنا بدأت مع الزعيم عادل إمام في المسرح، وبعدين محمد إمام، ومن بعدها المخرج رامي إمام وهو بجد قمة الأخلاق والتواضع حقيقي أستاذ عادل إمام ربه بجد.
