أكرم حسني: ما عرفتش أعمل أكشن في العميل صفر.. وصورنا الفيلم في الغردقة بعد ظهور القرش بأسبوع
تحدث الفنان أكرم حسني عن كواليس فيلمه العميل صفر الذي يعرض حاليا بدور العرض السينمائي، وينافس مع مجموعة كبيرة من الأفلام المعروضة ضمن موسم الصيف، والصعوبات التي واجهته خلال التصوير.
وقال أكرم حسني في لقاء تلفزيوني: معرفتش أعمل مشاهد الأكشن في العميل صفر.. أنا هعمل أكشن إزاي بالعقل؟ فيه حاجات ما أقدرش اعملها محتاجة لياقة، وفي حاجات محتاجة مدربين ومتخصصين زي واحد بينط من دور لدور المشهد ده عاوز السقا لكن إحنا البني آدميين العاديين لا، وعملت حاجات بسيطة زي مشاهد الغردقة والعوم واليخت والنط.
وأضاف أكرم حسني: لما كنا بنصور العميل صفر في الغردقة كان بعد ظهور القرش بأسبوع وكنت عامل فيها جريء وفي المياه مرعوب وببص يميني وشمالي وأحاول أنسى.. ولو طلع قرش مش هنعرف نعمل حاجة حتى لو متأمنين.. ولو كان طلع لي كنت هقف عمودي وابص له في عينه واضربه في منطقة حساسة زي ما شفت على السوشيال ميديا، أنا ممكن أعوم على البحر من بره ولكن لقدر الله لو أنا في مكان والمركب غرقت تبقى مصيبة سودة.
أكرم حسني يتحدث عن مشاركة فاطمة البنوي معه
وتحدث أكرم حسني عن مشاركة الفنانة السعودية فاطمة البنوي في الفيلم، قائلًا: من الناس اللي شفت في عينها لمعة الذكاء الفني وهي كاتبة ومخرجة وممثلة ومثقفة وعندها وجهة نظر وأول ما رشحناها كان سعادتي مش طبيعية لأني هقرب منها فنيا وأفهم دماغها.. وكمان سعيد بأسماء أبو اليزيد عندها خفة دم وتلقاية وطبيعية والناس حبوها في السينما ولما كنت بحضر في صالات العرض الناس بتسقف في مشاهد مع أسماء أبو اليزيد.
وأعرب عن سعادته بـ إشادة زملائه بالعمل مثل المخرج عمرو سلامة والفنان محمد دياب وماندو العدل وأحمد أمين، مؤكدًا أنه لا يوجد منافسة بينه وبين زملائه، إذ قال: مفيش بينا منافسة كفنانين.. والناس لو تعرف الحقيقة ده مش موجود.. العلاقة اللي بينا منتهى الحب والتعاون وبنفرح لبعض.. وممكن ما يكونش فيه فرص للتعاون القريب، ولكن محمد ممدوح لسه مكلمني قريب قال لي ما دخلتش فيلمك ومستنيك تيجي وندخل فيلمي وفيلمك مع بعض، وحسبة الفلوس مش هي دي أكبر همنا، وكل واحد بيشتغل علشان فنيا يعمل محتوى الناس تتبسط به وممكن يكون فيه تنافس شريف ومش مقصود ومحدش بيبص للتاني.
