ركين سعد: بخاف أتفرج على أعمال الرعب.. والناس هي اللي تقول عليّ نجمة أو لا
تحدثت الفنانة ركين سعد عن دورها في مسلسل سفاح الجيزة، الذي يعرض حاليًا على منصة شاهد vip، مؤكدةً أن العمل تطلب قدر كبير من المجهود خلال تحضيراته وتصويره.
وقالت ركين سعد خلال حوارها مع القاهرة 24: مسلسل سفاح الجيزة تعبنا فيه أوي وحضرنا للشخصيات كتير، تبعنا في التصوير ويا رب العمل يعجب الناس.
وبرغم من تقديم ركين سعد لعمل به قدر كبير من الدموية والتشويق، فهي لا تفضل مشاهدة أعمال الرعب، حيث قالت: بخاف أتفرج على أعمال الرعب بس معنديش مشكلة أعمل الأعمال دي، وبجسد في سفاح الجيزة شخصية زينة، هي متمردة وموهوبة وعندها أحلام، بتعدي برحلة معينة والحلم بتاعها بيتحول لكابوس.
ركين سعد: أنا لسة ببدأ والناس هي اللي تقول عليّ نجمة
وأكملت ركين سعد حديثها، مشيرةً إلى إنها لا تعتبر نفسها حققت النجومية حتى الآن، وقالت: مبسوطة جدا بوجودي في مصر وإن الناس بتآمن فيا وبيدوني أدوار صعبة ومركبة، وممتنة جدا إني موجودة على المنصات، بس بحس إني لسة ببتدي، والنجومية مش أنا اللي هقول على نفسي نجمة، الناس هي اللي تقول بس أنا بحب أقول عل نفسي ممثلة، وبحس إني في عالم تاني وأنا بمثل وده شغفي فأتمنى إني أفضل أعمل ده.
وعن مواصفات شريك حياتها التي ترغب الارتباط به، قالت ركين سعد: يكون بيضحكني ونكون مؤمنين ببعض وندعم بعض ويكون شخص كريم، وكل الحاجات اللي البنات بتكون عيزاها معنديش حاجة مختلفة أوي، بس مليش في الرومانسيات الزيادة أوي، أو إني أحلم بالحصان الأبيض وكدة.
واختتمت ركين سعد حديثها، كاشفةً خططها المهنية والحياتية المقبلة، وقالت: حاليا محتاجة أخد بريك وبقرأ كذا حاجة في الشغل، ومحصلش إن كان في ناس مش مؤمنة بيا في البداية بالعكس كل عيلتي والناس اللي اشتغلت معاهم من البداية كانوا مصدقين فيا وبيدعموني.
مسلسل سفاح الجيزة
يعرض حاليًا مسلسل سفاح الجيزة، على منصة شاهد vip، والعمل من بطولة الفنان أحمد فهمي، وكل من: ركين سعد، باسم سمرة، داليا شوقي، حنان يوسف، وآخرين، وعدد من ضيوف الشرف، وهو من إخراج هادي الباجوري.
