نادر حمدي: الموسيقى التصويرية لمسرحية تشارلي تشابلن استغرقت سنة تحضير.. ونفسي أشتغل مع محمد منير
تحدث الموزع الموسيقي نادر حمدي، عن كواليس تحضيراته للموسيقى التصويرية لمسرحية تشارلي تشابلن، كما كشف اسم المطرب الذي يريد المشاركة معه.
وقال نادر حمدي خلال حواره مع القاهرة 24، على هامش افتتاح مهرجان القاهرة الدولي للمسرح التجريبي: أنا جاي النهادرة في العرض بتاع مسرحية تشارلي تشابلن وأنا اللي عامل الموسيقى التصويرية لها والأغاني اللي بتتعرض فيها، الحمد لله ردود الفعل على المسرحية كويسة جدًا.
وأوضح: والعرض نفسه يعتبر جديد على المسرح في مصر، شكل جديد ومختلف، مسرحية ميوزيكال زي ما بتتعمل برا، والمجموعة كلها في العرض عاملين مستوى عالي جدا.
نادر حمدي: موسيقى تشارلي تشابلن استغرقت سنة تحضير
وأضاف نادر حمدي: موسيقى تشارلي تشابلن خدت مني سنة تحضير، واعتمدت فيها على الشكل اللي كان سائد ساعتها في عصر تشارلي تشابلن، كان بيتم استخدام موسيقى وآلات معينة، فكنت مراعي إني أكون زي ده، وكنت متفق مع المخرج إن برغم إن العرض عربي والكلام بالعربي، بس نخلي الموسيقى مش عربية أو شرقية عشان نحافظ هوية مزيكا تشارلي تشابلن.
وعن سبب قلة ظهور نادر حمدي الإعلامي، قال: مبحبش اللقاءات الكتير ومبحبش أتكلم بحب أعمل مزيكا أكتر، بحس إني مبعرفش أتكلم وبعمل مزيكا أحسن.
نادر حمدي: نفسي أشتغل مع محمد منير
واختتم نادر حمدي حديثه، كاشفًا اسم المطرب الذي يرغب في العمل معه، وقال: اشتغلت مع ناس كتير حلوة الحمد لله بس اللي لسة مشتغلتش معاه ونفسي، هو الكينج محمد منير، ودايما لما بنتقابل بنتكلم في مشاريع وبنقول لازم نشتغل سوا، بس ده لسة محصلش.
