شريف رمزي: أخويا في غيبوبة بقاله سنة وشهرين ومحتاج معجزة.. ادعوله يرجع تاني
طالب الفنان شريف رمزي من جمهوره الدعاء إلى شقيقه بالشفاء العاجل، حيث يمر الأخير بأزمة صحية شديدة، أدت إلى دخوله في غيبوبة منذ سنة وشهرين، إذ أكد الفنان أن شقيقه يحتاج لمعجزة حتى يسترد وعيه مرة أخرى.
وقال شريف رمزي خلال تصريحاته لـ القاهرة 24: أخويا بقاله سنة وشهرين في غيبوبة.. إحنا استسلمنا لقدرنا وراضيين، لكن أتمنى ربنا يشفيه ويرجع لنا من تاني، هو محتاج معجزة، وبطلب من كل الناس تدعي له.. حالته غير مستقرة يوم تتحسن يوم تسيء.. ادعوله.
الحالة الصحية لشقيق شريف رمزي
وخلال الفترة الماضية، أشار شريف رمزي إلى أن الحالة الصحية لشقيقه تحسنت بشكل طفيف، معقبًا: في حركة بسيطة من إيديه، لكنه ما زال في الغيبوبة، والدكاترة قالوا إن مفيش تدخل جراحي تاني ولا سفر برا هيحسن من حالته، هو خضع لعمليتين واحدة في الجمجمة، لتفريغ خُراج في المخ، والتانية بالعمود الفقري، لكن لسه في غيبوبة لغاية دلوقتي، ومفيش أي تغيير في درجة الوعي نهائي.
وأكد شريف رمزي أنه لم يرَ مثل هذه الحالات سوى في الأفلام والأعمال الفنية، وتكون من وحي خيال المؤلف، لكن ما صدمه هو مرور شقيقه بهذه الحالة، قائلا: مرينا بظروف صعبة، والحاجات دي كنا بنشوفها في الأفلام بس، لكن عمر ما حد كان يتخيل أبدًا اللي مرينا بيه.
