صبري فواز: مدين لخالد يوسف وهو بوابة خروج المواهب.. والأخير يرد: ممثل قوي اخترته للدور الصعب
تحدث الفنان صبري فواز عن المخرج خالد يوسف وفضله عليه، مشيرًا إلى أنه سيظل مدينا له طوال عمره لأنه اكتشف موهبته ومنح له مساحة ضخمة في الأدوار الفنية التي كان يرشحه لها.
وقال صبري فواز في لقائه ببرنامج مصر جديدة مع الإعلامية إنجي أنور: الحمد لله ربنا كرمني بأدوار كتير حلوة واتمطعت فيها تمثيل مثل الضوي في مسلسل العهد وسليم عثمان في نيران صديقة، ومحروس في بين السريات، والتوأم أيمن وكمال في الحصان الأسود، وكرم يونس في أفراح القبة والشيخ عرابي وغيرها، وفي مسلسل بينا ميعاد الجمهور شاف مني حتة جديدة والحمد لله ربنا كارمني بمساحة حلوة وأتمنى تستمر.
وأضاف صبري فواز، عن قصده بمصطلح تمطعت تمثيل، قائلُا: أخد مساحتي وراحتي وبالأخص بداية من دكان شحاتة وكلمني شكرا وكف القمر وبالفعل الوقت ده الناس شافت مساحة ضخمة لصبري فواز وهفضل طول عمري مدين لخالد يوسف، لأنه له فضل كبير عليا، خاصة أنه مخرج مغامر وما عندوش تخوفات، وفكرة المغامرة عملها مع عمرو عبد الحليل وعمرو سعد، فبيعتبر من المخرجين اللي بيكونوا بوابة خروج المواهب، وبقول له شكرا على الفرصة لأنها فرقة في حياتي وهفضل مدين ليك العمر كله.
خالد يوسف يرد على صبري فواز
من ناحيته رد خالد يوسف في مداخلة هاتفية بالبرنامج وقال: صبري فوازمن أول لقاء بنا على المستوى الإنساني وهو مميز وعميق الفهم في الحياة والفن وده كان انبطاعي لما شفته أول مرة، ولما جربته في دور لقيت قماشته عريضة جدا ويقوم بأي دور وأي إحساس يقدر يوصله وأي تناقض مع الإحساس في نفس الشوط، وكذلك المغامرة والأداء المتفرد ولقيت حكاية كبيرة قدامي، وأنا ما غامرتش أنا أعطيته حقه وهو لمع من فيلم لفيلم، وأثبت أنه ممثل كبير مش عابر وهيبقى علامة من العلامات الكبيرة.
وأضاف خالد يوسف: لما تشوفيه في كف القمر أو في كلمني شكرا هتشوفي إنه مش ممكن إن الشخص اللي يعمل دور الشيخ الأفاق هو اللي يعمل الأخ اللي بيتاجر في المخدرات، في نفس الوقت قدم دور ودور بعيد عنه.. وكنت بشوف الدور الصعب اللي فيه تمثيل قوي سواء مساحته صغيرة أو كبير ة ومتوسطة ما يفرقش معايا ولا معاه المهم إننا بنقدم حاجة مختلفة وتحديا وروية جديدة.
