مش استثمار نجاح وخلاص.. المؤلفة رنا أبو ريش: كنا رافضين تقديم جزء تاني من كامل العدد
أكدت المؤلفة رنا أبو ريش، أنها كانت رافضة هي ومخرج العمل لفكرة تقديم جزء ثان من مسلسل كامل العدد، بسبب تخوفهم من عدم نجاحه مثل الجزء الأول.
وقالت رنا أبو ريش لـ القاهرة 24: هنبدأ تصوير الجزء التاني من كامل العدد في شهر 11 المقبل، وكل أبطال الجزء الأول هيكونوا في الجزء التاني وتحمسوا للفكرة على طول، وفي أدوار جديدة هتنضم للجزء الجديد وجار تسكينهم دلوقتي، وفي أسماء كتير مترشحة محمِسة جدا وهتكون إضافة لعيلة كامل العدد.
وتابعت رنا أبو ريش: أكتر حاجة حمستنا لتنفيذ فكرة جزء تاني من كامل العدد، لما لقينا الناس حابة جدا جزء تاني، وبصراحة إحنا تخوفنا في الأول وكنا رافضين خالص، أنا والمؤلفة يسر طاهر والمخرج خالد الحلفاوي.
وأضافت رنا أبو ريش: لما لقينا الناس متحمسة والكاست ودينا الشربيني، قولنا تمام بس مش هنأكد ده غير لما نعمل معالجة، ولو لقينا حاجة تستدعي تتحكي وتعمل صدى أعلى من الجزء الأول هنقول تمام، هو مش استثمار نجاح وخلاص، ولكن لما بدأنا وكتبنا خطوط الشخصيات جميعا في الـ 15 حلقة كلهم، لقينا إننا هنعمله.
رنا أبو ريش تكشف مصير مصطفى درويش في كامل العدد 2
كما كانت كشفت رنا أبو ريش لـ القاهرة 24، مؤخرًا، مصير الفنان الراحل مصطفى درويش في أحداث الجزء الثاني، بعد مشاركته في الجزء الأول، وقالت: الله يرحمه مصطفى، مفيش حد هيقدر ييجي يكمل الدور مكانه، وهنحل عدم وجوده ده دراميًا، ولكن مفيش ممثل هيكمل الدور، صعب جدا نفسيًا علينا وعلى المُشاهد إن يتم استبداله.
مسلسل كامل العدد
عرض الجزء الأول من مسلسل كامل العدد في موسم رمضان الماضي 2023، والعمل من بطولة الفنانة دينا الشربيني، شريف سلامة، وغيرهما، والعمل من إخراج خالد الحلفاوي.
