المخرج أشرف فايق: الجمهور استباح التقييم والشتم.. وغلط إن الفنان يرد
علق المخرج أشرف فايق، على أزمات انتقادات الجمهور للفنانين خلال الفترة الماضية، مؤكدًا أنه لا يجب على الفنان الرد على الانتقاد الموجه له.
وقال أشرف فايق في لقائه مع القاهرة 24: غلط الفنانين اللي بيردوا لأن الفنان إنسان قبل ما يكون فنان، ولو بنتكلم على الجمهور فهو من ساعة الكورونا لأنه قعد مقفول عليه سنتين كاملين، استباح لنفسه التقييم والشتم.
وأردف قائلا: وطول عمرنا نقول إن مش كل الناس هتجتمع على أن شخص او عمل فني عظيم او مش عظيم، اللي عايز يتقبل الآخر يتقبله واللي مش عايز ميتقبلوش.
كما كشف المخرج أشرف فايق رأيه في الذكاء الاصطناعي، قائلًا: الذكاء الاصطناعي مالهوش علاقة بالتأثير على فن، زيه زي أي اختراع في البداية بيكون له سلبيات وإيجابيات، وفي النهاية الإيجابيات هي اللي بتفضل، والناس بتتعامل معاه على إنه اختراع وبيجربوا ومع الوقت بيستخدموه للخير والتطور في المسائل الفنية.
أشرف فايق
وعلى جانب آخر، سبق وأن أعلن المخرج أشرف فايق، عن تعرضه لوعكة صحية، حيث كتب عبر حسابه الشخصي بموقع فيسبوك: حسيت إن دمي تقل في الفترة الأخيرة فقلت أعمله قسطرة واخففه شوية، فحجزت عند الدكتور حازم منصور، بطل العالم في القلب والقسطرة، بمساعدة صديق عمري عبد الله خليل، وفرصة أشكرهم جدًا.
وتابع: وأنا دلوقتي بقيت كويس واطمنت على دمي وقلبي وشراييني، وبطمنكم وبشكر كل الأحباب اللي حاولوا يتواصلوا بالاتصال أو بالرسائل، ولم أستطع الرد عليهم وبقولهم سامحوني وكتر خيركم الحمد والشكر لله تعالى.
