محمود البزاوي: مبعملش للفلوس قيمة.. وأول مصروف بحياتي كان ربع جنيه في الشهر
قال الفنان محمود البزاوي إنه لا يقدر الأموال في حياته إطلاقًا، مشيرًا إلى أنه لم يأخذ أي مصروف إلا في المرحلة الإعدادية، وتحدث كذلك عن تفاصيل أول عمل من بطولته المطلقة والذي لم يكتمل، وانتمائه الكروي وتشجيع نجله لـ نادي غزل المحلة.
وأضاف البزاوي، في تصريحات تلفزيونية: متودكتش على الفلوس، ومتربتش على أني أعملها قيمة، الفلوس مبتفرقش معايا، وممسكتش في إيدي فلوس حقيقية غير وأنا في 3 إعدادي، ابتدى يتعملي مصروف لما طلبت وقلت لأسرتي ليه مليش مصروف، اتعملي ربع جنيه في الشهر.
أما عن تفاصيل أول عمل من بطولته المطلقة الذي لم يكتمل، فعلق محمود البزاوي، قائلًا: كان في فيلم بطولة، ليها وزن وثقل من إخراج صلاح أبو سيف، مضيت على الفيلم لكن مصورتش، فمشيت من الزمالك لحد الجيزة مبتسم، وتعمدت ابتسم وأقول الحمد لله، لأني وصلت لمرحلة أني ابقى بطل، وبيتعرض عليا أعمال بطولة، قلت مجتش المرة دي بس معنى أني وصلت للمرحلة دي يبقا هتيجي تاني، أنا عايش حياتي بكتشف نفسي.
وواصل البزاوي: نفسي أبطل كسل، أنا شخص خايب في التعامل مع نفسي، ومُقصر في حق نفسي كسيناريست كمان، لأني كتبت حتى لا أريق ماء وجهي في التمثيل، لأن وقتها مكنش حد شايفني، في مخرجين وكتاب كنت في وسطهم من زمان، ومكنوش شايفني، لكن عندي إيمان إنك لو موهوب وعندك حاجة ربنا مديهالك هتخرج للنور وهيجي وقتها، أنا لسة في بداية حياتي متغيرتش من أول يوم حتى الآن.
محمود البزاوي: ابني بيصعب عليا علشان بيشجع غزل المحلة
وتحدث البزاوي عن انتمائه الكروي هو ونجله، قائلًا: ابني ربنا يعينوا بيشجع غزل المحلة، أنا أهلاوي وبيصعب عليا المحلة، وفكرة أن فيه نجوم عالمين يجوا يلعبوا في غزل المحلة كان فيلم وهزار.
