بعد وفاته.. المؤلفة أماني التونسي تكشف مصير دور طارق عبد العزيز في مسلسل وبقينا اتنين
كشفت المؤلفة أماني التونسي مصير دور الفنان طارق عبد العزيز في مسلسل وبقينا اتنين، الذي توفي أثناء تصويره اليوم، بشكل مفاجئ، عن عمر ناهز 55 عامًا.
مصير مسلسل وبقينا اتنين
وقالت أماني التونسي خلال تصريحات خاصة لـ القاهرة 24: هحاول أشوف حل درامي للدور، لأنه كان عامل دور مهم أوي ودي مشكلة كبيرة خصوصًا إن عرض المسلسل الأسبوع الجاي، لكن طبعًا مش أكبر من مصيبة إنه توفي، صدمة كبيرة جدًا لينا ولعيلته.
وأضافت: لازم هشوف سياق الدراما في المسلسل وهخلصه، ومش هييجي حد مكانه ويعمل الدور، هنشوف حل درامي، ولكن الأول لازم أقعد مع الإنتاج وأشوف هو صور قد إيه، وإيه كان آخر مشهد عشان أعرف أكتب وأغير السياق، أنا كنت مخلصة المسلسل كامل ومسافرة بره مصر هرجع وأغير في السياق.
وأردفت أماني التونسي: هو مات في الشغل دي حاجة كويسة جدًا، أي حد بيتمنى إنه بيموت في الشغل وإنه لحد آخر يوم في عمر الإنسان بيشتغل وواقف على رجله.
المنتج كريم أبو ذكري يكشف تفاصيل اللحظات الأخيرة في حياة طارق عبد العزيز
وسبق وأوضح كريم أبو ذكري منتج مسلسل وبقينا اتنين خلال تصريحات خاصة لـ القاهرة 24، أنه لم يتعرض الفنان لأي ضغط، قائلًا: كنا بنصور بقالنا حوالي 4 ساعات، وهو كان جاي بيضحك ومكنش باين عليه إنه هيحصله أي حاجة، وفجأة وقع ونقلناه المستشفى واتوفى بعدها بساعة.
