رامي صبري: فلسطين طول عمرها بتموت.. وإحنا بنعول أُسَر مينفعش نوقف شغل
علق الفنان رامي صبري على انتقاد بعض الجمهور للفنانين الذين يواصلون تصوير وتسجيل أعمالهم الفنية في ظل الظروف العصيبة التي تمر بها فلسطين وما تتعرض له من إبادات.
وقال رامي صبري خلال بث مباشر له عبر حسابه الرسمي بموقع إنستجرام، وعلق: الكومنتات اللي بتقول أنت بتغني إزاي وفلسطين بتتضرب، يعني إحنا مش هنفضل قاعدين بناكل وبنشرب وبننام، فهي بس الناس اللي بتكتب الكومنتات دي مش فاهم بتكتبها على أساس إيه؟، ده شغلنا ودي عقود كاتبنها، ومنقدرش إننا منشتغلهاش.
رامي صبري: فلسطين بتتضرب من قبل ما إحنا نيجي الدنيا
وأضاف رامي صبري: مش ببقى فاهم أوي الناس اللي مش عايزانا نغني ونشتغل، وبزعل لما بلاقي الناس بتفكر كدة لكن معنديش حاجة أعملها، فلسطين على فكرة بتتضرب من قبل ما إحنا نيجي الدنيا، وإحنا هنعمل إيه، بنعمل اللي علينا وممكن مثلا نغني لفلسطين وندفع فلوس وكل حاجة عشان نتضامن، لكن نوقف شغلنا؟.
وتابع رامي صبري: طب أنت لما بتوقف شغلك مش بتتفرج على الماتشات اللي شغالة مثلا؟ مش بتروح الاستاد وتدفع فلوس عشان تروح تتفرج على فريقك وهو بيلعب؟ مش بتصحى تاكل في بيتك؟ لا بتخرج وبتعيش حياتك، طب بتخرج ليه مدام فلسطين بتتضرب وبتموت، نموت إحنا كمان طيب؟.
رامي صبري: فلسطين طول عمرها بتموت.. والتضامن إني أعمل حفلة وأتبرع لها بيها
وأردف رامي صبري: بكبر دماغي، والناس اللي بتقول بتشتغل ليه يا فنان وفلسطين بتموت، ما فلسطين طول عمرها بتموت، مش فلسطين بس لا كل البلاد زي البوسنة، فنموت إحنا كمان عشان نبقى كويسين من وجهة نظركوا؟ مش هو ده التضامن، ما أنا ممكن أعمل حفلة وأتبرع بيها لفلسطين.
رامي صبري: بنعول أُسَر مينفعش نوقف شغلنا
واختتم رامي صبري حديثه، مشيرًا إلى أن مهنة الفن مختلفة عن باقي المهن، ولكنها تظل مهمة، قائلًا: إحنا آه شغلانتنا مختلفة عشان فيها فرح وسعادة بس ده شغلنا، مش هينفع نوقفه واللي بيفكر كدة ده غلط، لأننا بنعول أُسر وعندنا حياة مينفعش نوقف عشان فلسطين بتموت، بس مش لازم إحنا كمان نموت يعني، وتحيا فلسطين وإن شاء الله الفترة الجاية تبقى أحسن.
