خالد النبوي عن نور الشريف: قالي لو هتختار بين السيناريو الوحش والقاعدة في البيت أوعى تقعد
تحدث الفنان خالد النبوي، عن تفاصيل علاقته بالراحلين نور الشريف وأحمد زكي، مؤكدًا أن لنور الشريف فضلًا عليه في استمراره سينمائيًا في بداياته.
وقال خالد النبوي، خلال لقائه مع الإعلامي محمود سعد في برنامج sold out: مش سهل أبدًا تكون نور الشريف، وأنا دخلت المكتب عنده في رمسيس وشوفت الـ 22 جزء بتوع كتاب قصة الحضارة، وهو كان بيعمل لينا لقاء علشان كان عنده فيلم عايز فيه شباب صغير من معهد الفنون المسرحية، فأنا لما شوفت بيتعامل مع الكتاب إزاي ومتجلد إزاي فأنا قولت أنا عايز يبقى عندي الموسوعة دي وفعلًا جبتها، ونور الشريف اللي قالي لازم تستمر.
وأضاف خالد النبوي: نور الشريف قالي الاستمرارية هي أساس السينما إوعى تبعد حتى لو عندك فيلم مش حلو والسيناريو مش عاجبك وتختار بينه وبين إنك تقعد في البيت لأ متقعدش في البيت، لأن وأنت بتشتغل هيجيلك السيناريو اللي يعجبك لغاية ما تبقى قادر تتحكم ومتعملش غير الكويس.
وأكد خالد النبوي أنه اختار أن يكون ممثلًا بسبب الراحل أحمد زكي، قائلًا: ممكن تبقى نجم عن طريق إنك تخلي شخصياتك نجوم زي أحمد زكي، أحمد زكي بيعمل الشخصية بتبقى نجمة، زي أنك عايز تشوف البيه البواب الشخصية بتبقى النجم وبعدين أحمد زكي بيجي وراها.
وأكمل خالد النبوي: أنا بتعلم لما بتفرج على أحمد زكي، ولولا أحمد زكي مكنتش هفكر في التمثيل، وأنا كنت بقول لنفسي أنت هتبقى نجيب الريحاني، لأني كنت بتفرج عليه بقول ده مش معقول.
واستكمل: المجهود نمرة 1، والالتزام بمجموعة أشياء من ضمنها المجهود، أنا أصلي شوفت فؤاد المهندس وقعدت معاه، وأستاذ عبد المنعم مدبولي ومثلت معاه سنة على المسرح، وشوفت أحمد زكي ومحمود مرسي ومثلت مع محمود مرسي في الإذاعة، والحلم أنك نفسك تبقى زي دول، فعشان تبقى دول يكلفك حياتك بلا شك.
خالد النبوي: عملت رسالة الإمام في 9 شهور وهو كان محتاج 3 سنين
كما تحدث الفنان خالد النبوي، عن مسلسه رسالة الإمام الذي خاض به السباق الرمضاني الماضية 2023، قائلًا: أنا لازم أشتغل على الممثل كل يوم حتى لو مفيش شغل، سواء بقرأ أو بسمع مزيكا أو اتمرن على جسمي.
واستطرد خالد النبوي: أنا عندي توقيت للإجازة، ولكن وقت ما كنت بعمل شخصية الإمام الشافعي مكنش ينفع آخد إجازة، لأنهم كانوا عايزني أعمل ده بالبروفات وكل حاجة في 9 شهور وأنا شايف أنه محتاج 3 سنين، أعمل إيه بقى؟
