أحمد العوضي: إن شاء الله نور النبوي وكزبرة ينجحوا بالحريفة.. والأكشن مش مُجهد بالنسبة لي
علق الفنان أحمد العوضي على مقابلته للفنان الشاب نور النبوي وأبطال فيلم الحريفة أمس الخميس أثناء مشاهدته فيلمه الإسكندراني رفقة الجمهور في السينما، بجانب الكشف عن كواليس مشاهد الأكشن بالعمل.
وقال أحمد العوضي خلال لقائه مع القاهرة 24: شوفت نور النبوي وكزبرة وأحمد غزي، وكلهم إخواتي الصغيرين واتبسطت إني شوفتهم ومبروك ليهم على الفيلم، وإن شاء الله ينجحوا وكلنا زملاء.
أما عن مشاهد الأكشن بفيلم الإسكندراني، فقال أحمد العوضي: الأكشن طبعًا بقيادة مع مصمم المعارك أخويا وصحبي محمود طاحون، دايمًا بنشتغل مع بعض ومحمود اجتهد في الفيلم أوي، وكده كده حياتي عبارة عن تمارين رياضة فالأكشن مش مجهد بالنسبة ليا، ولكن التركيز في التمثيل هو اللي بياخد مجهود.
وتابع: أنا بجتهد وبعمل اللي عليا وربنا بيديني على قد تعبي، سواء في الدراما أو السينما، ولما نزلت السينما كنت عايز أحقق نفس النجاح اللي حققته في الدراما وأعمل اسم في السينما، والحمد لله رب العالمين وإن شاء الله الإيرادات تبقى كويسة.
كما أعرب الفنان أحمد العوضي، عن سعادته بازدحام الجمهور حوله بصالة السينما أثناء مشاهدته فيلم الإسكندراني برفقتهم، قائلًا: بشكر كل إخواتي والزحمة وأن السينمات كلها كاملة دي حاجة فرحتني وده جهد كلنا تعبنا فيه سواء أنا أو زملائي في الفيلم بقيادة المخرج خالد يوسف، وربنا كرمنا على قد التعب، ولسة اللي جاي أحسن.
وأضاف أحمد العوضي: الحمد لله رب العالمين وأنا وسط الناس دي حاجة بتبسطني وربنا يديمها عليا نعمة.
أبطال فيلم الإسكندراني
ويشارك في بطولة فيلم الإسكندراني كل من: الفنان أحمد العوضي، زينة، حسين فهمي، بيومي فؤاد، محمود حافظ، صلاح عبد الله، إنتصار، عصام السقا، وهو من إخراج خالد يوسف، ومن تأليف الكاتب الراحل أسامة أنور عكاشة.
