محمد رمضان: شميت ريحة النجاح بين لاعبي المنتخب.. وإن شاء الله هنفك النحس
كشف الفنان محمد رمضان، كواليس لقائه مع لاعبي منتخب مصر في كأس الأمم الإفريقية، متمنيًا الفوز بالبطولة للمرة الثامنة، موجهًا رسالة لـ لاعبي المنتخب.
وقال محمد رمضان، خلال مداخلته الهاتفية على قناة DMC: أكيد هحضر ماتش بكرا وقابلت الفريق بقيادة كابتن محمد صلاح صاحبي وأخويا وبنتكلم على طول، وأنا شميت ريحة نجاح وألفة وحابين بعض جدًا، وفي صدفة متفائل بيها جدًا رقم السويت عندي 1124 ورقم تي شيرت كابتن مصر، وإن شاء الله نرجع من تاني.
وأكد محمد رمضان: أنا حاسس أن السنة دي إن شاء الله البطولة بتاعتنا، وأنا كنت بتكلم أن المدير الفني يفك وجهة النظر دي أن 90% من البطولات اللي أخدناها كانت بمدرب مصري، وإن شاء الله نفك النحس السنة دي ونمشي كابتن أجنبي مبسوط من عندنا.
محمد رمضان يوجه رسالة لـ لاعبي منتخب مصر
أما عن رسالته لـ لاعبي المنتخب، فقال محمد رمضان: قولتلهم لو في كل لحظة افتكرتوا في الـ فوق 100 مليون مواطن أننا نقدر نسعدهم ده يديهم طاقة فوق طاقتهم، وده أنا قولته وأنا قاعد مع محمد صلاح وكهربا، قولته لما شخص بيجري وقدامه أتوبيس سرعته بتتضاعف، ولو بيجري وراه كلب سرعته بتتضاعف، لو حطينا الاتنين قدامنا أننا عايزين ناخد البطولة وناس مش عايزة ده، ومنشمتش فينا حد أن مش عايزين مصر تعلى.
