حسن أبو الروس: استوحيت شخصية عز في حالة خاصة من محامِ حقيقي.. وتمسكت بالدور جدًا
تحدث الفنان حسن أبو الروس عن شخصية عز التي قدمها ضمن أحداث مسلسل حالة خاصة، والذي انتهى عرضه مؤخرًا، وهو من بطولة الفنان طه دسوقي وعدد من الفنانين.
وقال حسن أبو الروس خلال ندوته في القاهرة 24: أنا شوفت ناس حقيقة شبه شخصية عز وقلدتهم في حياتهم، وفي محامي بدون ذكر أسماء شبه عز بالظبط وعنده نفس البِدل والسكسوكة، وقلدت الراجل ده بالظبط، لأنه زي ما هو سخيف هو بيضحك، وقدرت أخلي الناس تكرهني وده اللي كنت عايز أعمله.
وأضاف حسن أبو الروس: هو فعلا لازم يتكره لأنه بيعمل حاجات مش كويسة، وفي الآخر خليت الناس تحبه تاني لما اتغير وبدأوا يفهموا هو ليه بيعمل كده، والمنتج طارق الجنياني لما بعتلي الدور ده اختفى فترة، فـ أنا اللي كلمته عشان أقوله أني عايز أعمل الدور ده لأن ده دور يطلع منه حاجة وإيفيهيات.
وسبق وتحدث حسن أبو الروس عن مشاركته مع الفنان طه دسوقي في مسلسل حالة خاصة، وقال خلال ندوته بالقاهرة 24: طه شاطر وأصعب حاجه الكوميديا، وهو قدها ويقدر يضحكنا ويبكينا وأنا مكنتش مصدق نفسي؛ لأنه وقت التمثيل بيبقى واحد تاني وطه عرف يقلد طريقتهم والتوحد بالظبط واتعايش معاهم وقدر يحسسنا بيهم جدًا ومبسوط بالتعاون معاه.
مسلسل حالة خاصة
وشارك في بطولة مسلسل حالة خاصة الفنان طه دسوقي، هاجر السراج، علي السبع، حسن أبو الروس، غادة عادل، وغيرهم، والعمل من إخراج عبد العزيز النجار.
