أورتيجا يكشف سبب غيابه عن الغناء: الناس بتحاربني وبيقفلولي الأكونتات.. وبكلم ربنا وبشكيله | فيديو
كشف مغني المهرجانات أورتيجا سبب غيابه عن الساحة الفنية منذ عام ونصف، وذلك بعد عودته من جديد بأغنية بعنوان مش فارقة معايا.
وتطرق أورتيجا للحديث عن سبب غيابة، وذلك خلال ندوته بالقاهرة 24، وأكد أنه منذ بدايته الفنية في عالم أغاني المهرجانات حقق نجاحا كبيرة، على الرغم من تعرضه للحرب والأذى منذ دخوله الفن، وخلال الفترة الماضية شن البعض عليه حربًا كبيرة سببت له ضررا كبيرا في أعماله الغنائية.
وأوضح أورتيجا: الفترة اللي فات اتحاربت جدا، وفي ناس قفلت الأكونتات بتاعتي، فقولت مش هعمل حاجة ولا هنزل حاجة، لأن الأغاني اللي بنزلها محدش كان بيشوفها ولا يتفرج عليها، لأني مبفهمش في السيوشيال ميديا، أنا بسجل الأغنية في الاستوديو وأنزلها وخلاص، مكنتش بتجيب مشاهدات خالص وأرقام غريبة ومش طبيعية.
وتابع أورتيجا: قابلت ناس قالولي أنت إزاي بتشتغل كدا أصلًا أكونتاتك كلها بايظة، فقولت هنوقف لحد ما نشوف حل، وده سبب الغياب، لحد ما قدرت أحل الموضوع ده خطوة بخطوة وكانت البداية من أغنية مش فارقة معايا، وعن هؤلاء الأشخاص، علق أورتيجا: حسب التحريات الجميلة، عرفت بعض الناس دي ومعملتش فيهم حاجة ولا كلمتهم، أنا بكلم ربنا وبشتكيله وناوي أنجح وبس.
أورتيجا في ضيافة القاهرة 24
وكرّم موقع القاهرة 24 مطرب المهرجانات أورتيجا، وذلك بعد عودته للساحة الغنائية مرة أخرى بعد غياب عام ونصف، بأغنية مش فارقة معايا، والتي طرحها مؤخرًا على قناته الرسمية على موقع يوتيوب، وحققت نجاحًا وتفاعلا معها الجمهور.
وكشف أورتيجا خلال ندوته بالقاهرة 24، سر غيابه عن الساحة الغنائية منذ عام ونصف، بجانب حقيقة وجود خلاف بينه وبين أوكا، بعدما حقق الثنائي نجاحا كبيرًا، وتطرق أورتيجا للحديث عن جديد أعماله خلال الفترة المقبلة.
