فريدة سيف النصر تكشف سبب اعتذارها عن التكريمات: مش من هواة لم شهادات وتماثيل
كشفت الفنانة فريدة سيف النصر سبب اعتذارها عن حضور بعض التكريمات التي تعرض عليها، بعد نجاحها في أي عمل فني، حيث أشارت الفنانة إلى أنها ليست من هواة الفنانين الذين يجرون وراء الشهادات، من أجل الظهور والتكريم وكأنهم رقم واحد في العمل.
وكتبت فريدة سيف النصر منشورًا، عبر حسابها الشخصي بموقع التواصل الاجتماعي قالت فيه: والنبي ما تزعلوا مني افهموا طبعي، والله العظيم ده التكريم 15، وقبله جرائد كبيرة وقنوات وحتى في لبنان وجريت هربت، وكل سنة كتير، أنا مش من هواة لم شهادات وتماثيل.. وأجري لوحدي وكأني نمبر وان العمل، لأ أي عمل عملته وراه ناس كتير أوي لنجاحي.
فريدة سيف النصر تكشف سبب اعتذارها عن التكريمات
وواصلت فريدة سيف النصر: أنا باخد اللي أكبر من كل ده أنا في حضن قلبي جمهوري، واللي بيعمله معايا دائمًا رغم أي حد بيردم على نجاحي تراب، هما بيشيلوا التراب ويحطوا دهب والماس، بحبهم اللي كنوز الدنيا ما تقدرش تشتريه لأي حد.. أعتذر كل تكريم وبحبكم لكن من الظلم ترك الآخرين في الظل.
وأضافت فريدة سيف النصر: سامحوني دي فريدة وتفكيرها اللي جايبني ورا لكن هاعمل إيه دي أنا، بالمناسبة بتكلم عن زملاء عجبوني أوي اتقال لي انتي عبيطة بتنوري غيرك اللي ماجابش سيرتك تاني، أنا مالي دي أنا، ويمكن ضميري ده اللي محبب خلق الله فيا بأمر من رب العالمين، يا ناس خلوها على الله دي كلها متر في متر فوقوا والنبي.
