مواطنون يعثرون على عجوز يدفن “أعمال” داخل الأرض.. والأخير: علاج عشان أنا تعبان (فيديو)
نشر شاب واقعة تقشعر لها الأبدان، عبر أحد الصفحات الشهيرة بموقع التواصل الاجتماعي “فيس بوك”، روى خلالها مشاهدته لرجل يقوم بأعمال السحر والشعوذة من أجل التفرقة بين الأزواج وإيذاء الفتيات.
وقال شاهد العيان في منشوره: “كنت بصطاد انهارده من بعد الفجر كدا بشويه أنا وعبدالرحمن اخويا بعدين دخل علينا الراجل دا اللي خلاني حسيت بإرتياب منه من أول ما دخل المشايه أولاً لا معاه عدة صيد، ولا دا وقت قعده ع البحر ولا دا مكان قعده”.
وأضاف،” ثانياً وهو معدي علينا قال صباح الخير ودخل قعد ورانا في مكان متداري فضلت متابعه حوالي ساعتين من قبل ٧ لحوالي الساعه ٩ وهو عمال يطلع في ورق بني تقيل شبه ورق الجرايد، يكتب عليه ويبله في مايه وسخه كانت في نص ازازه جابها من الزباله معرفش كان حاطط في المايه ايه بس ريحتها كانت قذرة جداً “.
وأكمل قائلًا: “قربت منه كذا مره وأنا بصطاد ولاقيته بيتمم بكلام مش مفهوم و بيداري الورق اللي في ايده اللي اتأكدت انه عمل، لما شوفت الكتابات اللي عليه ساعتها كنت حاسس اني لو دخلت عليه هقتله و اخويا مش هيقدر يحوشني عنه”.
وعن رد فعله قال: “لميت العده واديت لاخويا شنطة الصيد والتليفون وطلعت اروحه عشان ارجعله لوحدي، ساعتها قابلنا واحد محترم اسمه باشمهندس عبدالحميد شغال في الاداره الزراعية، رحت قايله خلي عبدالرحمن اخويا معاك في واحد هنا بيعمل كذا كذا انا نازل اكسره”.
وتابع: “قاللي استهدي بالله انت متأكد قولتله متأكد، قاللي طيب أنا هلف من وراه اشوفه واتأكد منه قولتله علي ما تتأكد هنزله أنا أول ما نزلت سألته انت بتعمل ايه من الصبح، قاللي انت مالك روح شوف شغلك قولتله انت شغلي انهارده طلع الاعمال اللي انت كنت بتعملها دلوقتي”.
وبعد مواجه الرجل بأفعاله قال: “راح ساببلي بالدين وزاققني وقعد يتمتم بكلام غريب وهددني انه يأذيني قال يعني هخاف منه ويجري روحت نازل عليه بالاقلام ومقعده في الأرض ونازل فوقه ضرب بشكل هيستيري”.
وأشار إلى أن شخص يدعى “الباشمهندس عبدالحميد” قام بفك الاشتباك بينهما، وبدون وجوده كان من الممكن أن يرتكب جريمة قتل في ذلك الرجل.
واستكمل: “لف و جه جري هو واخويا وفضل يهدي فيا وانا بشكره لان لولا وجوده كنت فعلاً موته في ايدي و الله ساعتها اخويا طلع التليفون وصور، و زي ما انتم شايفين كدا طلعت من جيبه اعمال منهم اللي معمول بوقف الحال و الربط والتفريق بين الراجل ومراته ومنهم بالهم والمرض و الاذي”.
واعتذر الشاب عن الألفاظ التي صدرت منه داخل الفيديو، مؤكدًا أنه لم يقصدها ولكنها من شدة انفعاله على الرجل، قائلا: “انا اسف ع الالفاظ اللي طلعت مني في الڤيديو غصب عني، بس يا ريت محدش يفكر انه يتعاطف معاه او يعاتبني اني مديت ايدي عليه لأني مسكت نفسي علي قد ما اقدر”.
وأوضح : “الاشكال اللي زي دي هما واللي بيروحولهم، يستاهلوا الحرق اللي يقبلوا التفريق بين راجل و مراته و اللي يأذوا بنات الناس بوقف حالهم، و يتسببوا في مرض انسان او جنونه يستاهلوا القتل مش الضرب بس !”.
وتابع : “انا منزل صورة بطاقته وكارنيه الطريقه الرفاعيه بتاعته اللي بيتداري فيه علي انه درويش ولا صوفي هو قال انه قاعد في شارع المرجيحه في تل البلد يا رب الناس تفهم بقا ان دا كفر بالله وانهم لو متابوش عن اذية الخلق هيتحشروا مع الأشكال الضاله اللي زي دي في نار جهنم بأذن الله”.
