بحضور الأبناء.. زوجان يقيمان حفل زفاف بعد زواج 5 سنوات

قالت الزوجة نورا وهي من محافظة الشرقية: احنا كنا مرتبين للفكرة من أول يوم جواز، لأن قبل فرحنا حصل حالة وفاة واضطرينا إننا نلغي كل حاجة كنا هنعملها، وساعتها قعدت أعيط كتير عشان كنت بحلم باليوم ده، بس هو قالي أنه هيعوضني بعد كده.

وأضافت نورا، أنه مر 5 سنوات على زواجهم وحملت خلالهم وأنجبت 3 أطفال، وفي ذكرى يوم زواجهم، قالت له: تعالى نعمل سيشن وأنا البس فستان عروسة وأنت تلبس بدلة وصحابنا هيساعدونا في الموضوع ده، وهو وافق على طول على الفكرة عشان الموضوع كان في دماغه.

وأشارت نورا إلى أنهم بدأوا في التحضير للفكرة قبل عيد زواجهم بأسبوع، وقالت: متوقعتش إن الفكرة هتعمل ضجة بالشكل ده، وأنا مش شايفة إنها حاجة عيب أو حرام بالعكس ده زوج بيحاول يسعد زوجته، وأحسن حاجة في الموضوع إن ولادنا كانوا معانا وهتفضل ذكرى ليهم.

وأوضحت نورا، أن تحضيرات اليوم بدأت منذ الصباح الباكر وقالت: روحت للبيوتي سنتر عشان أعمل مكياج، وهو راح للحلاق، وكنا جايبين فساتين للبنات وبدلة للولد البيبي، وبعدين جولي البيوتي سنتر الساعة 4 وكان معاه بوكيه ورد، واتحركنا بعربيتنا لمكان السيشن ومكانش معانا أي حد خالص من قرايبنا أو صحابنا، وبعدها نزلنا صورتنا على الفيس بوك.

ووجهت نورا رسالة للأزواج فقالت: اتبسطوا واستمتعوا بحياتكم، انتوا بتعيشوا مرة واحدة بس، وميهمكوش كلام الناس ولا تعليقاتهم عشان انتوا مبتعملوش حاجة حرام.

وقال الزوج فاروق وهو من محافظة الشرقية: هي تعبت معايا كتير لأن حياتنا مكانتش كلها تبات ونبات، وهي إنسانة محترمة ماشوفتش منها إلا كل خير، فكان طبيعي إني احققلها حلمها إنها تلبس فستان فرح، وأنا شايف إن الموضوع مكانش يستحق الضجة دى كلها لأنه مجرد زوج بيفرح زوجته.

ووجه فاروق رسالة للأزواج: أنا بطلب من كل زوج إنه ما دام قادر يسعد زوجته ويحققلها طلبها يعمله وميخافش من الناس لأن كده كده ماحدش هيسيبك في حالك.

وأضافت نورا: أنا عاوزة أقول للناس احنا مش بتوع شهرة، وماعندناش تيك توك عشان اللي بيقول إننا عاوزين نركب التريند ونكسب أي فلوس.