مشروبات مجانًا لغير القادرين.. عامل بكافيه الدقي: مش طمعانين غير في الثواب
يقدم أحد الكافيهات في منطقة الدقي، مشروبات مجانًا لغير القادرين، حيث قام صاحب الكافيه بوضع لافتة أعلي باب المحل ليشجع المواطنين الغير قادرين على دخول المكان وطلب ما يريدونه مجانًا.
قال سامح محمود الذي يعمل بكافيه في منطقة الدقي منذ فترة: دايمًا المكان مفتوح للناس في الخير، وفي ناس بتبقى عارفة انهم لما يخشوا عندنا هياخدوا اللي عاوزينه لله.
وأضاف سامح: صاحب المحل لاحظ أن في ناس بتبقى ماشية في الشارع وعاوزة تشرب بس مش معاهم فلوس، ومن هنا فكر أنه يحط يافطة قدام المحل وكتب عليها من لم يستطع يوجد هنا قهوة وشاي مجانًا، عشان يشجع الناس اللي مش معاها فلوس إنه ا تخش المكان وتاخد اللي هي عاوزاه.
كما أوضح العامل بالكافيه أنه تم تنفيذ هذه الفكرة منذ 3 سنوات، كما أنها لم تؤثر أبدًا على دخل المكان، قائلا: الحاجة اللي معمولة لله ربنا بيزيد فيها أكتر وأكتر.
وأشار سامح إلى أن هناك العديد من زبائن الكافيه عرضوا تقديم مساعدتهم للمشاركة في هذه الفكرة: الناس بتقولنا ياريت كله يعمم الفكرة دي ويساعد فيها.
وأكمل سامح حديثه قائلًا: احنا مش عاملين الفكرة دي عشان نشهر المكان، احنا عاملينها لله، وأحنا بنتكلم في الموضوع ده عشان عاوزين الناس تعمم الفكرة دي، وأحنا مش طمعانين غير في الثواب بس من عند ربنا.
