الطفل أيوب بائع الذرة المغترب: عايز شغلانة شريفة.. ونفسي أخش كلية الحقوق
قال الطفل أيوب نصر الدين حسن، وهو من محافظة أسيوط، بمركز أبو تيج، بقرية البلايسة، والبالغ من العمر 14 عامًا، ويعمل كبائع ذرة متجول في الشوارع، إن شقيقه الصغير يحتاج إلى مصاريف دراسته، ووالده يعاني من مياه زرقاء على العين، بالاضافة إلى كونه مريض سكري، ويحتاج إلى مصاريف لعلاجه، ولذلك يتولى هو وشقيقه الكبير مهمة التكفل بمصاريف والده ووالدته وشقيقه الصغير، مضيفا: احنا قاعدين في أوضة وحمام في شارع السد العالي.
وأوضح الطفل أيوب، أنه يتجه في الصباح الباكر بعد استيقاظه مباشرًا، إلى أحد التجار ليشتري منه الذرة ؛ حتى يتجول به في الشوارع ويبيعه للمواطنين، مردفا: بشتري على حسب السوق، وبجيب العربية من الجراج وبرص عليها الذرة، وبعدين أفطر واطلع ابيع للناس.
كما أشار بائع الذرة أيوب، إلى أنه يحدد سعر بيع الذرة للمواطنين على حسب السعر الذي يدفعه للتاجر، قائلا: لو اشتريته بجنيه ببيعه بـ 3 جنيه، ولو بجنيه ونص مثلًا ببيعه بـ 4 جنيه، عشان لسه بشتري شوال فحم بـ 75 جنيه، وبدفع إيجار وجراج للعربية، وفلوس السكن اللي قاعدين فيه، غير أكلي وشربي ومصاريفي.
وقال الطفل أيوب: البلد عندنا واقفة خالص مفيش شغل، لو كان فيه شغل ماكنتش اتغربت عن أمي وأبويا وأخويا الصغير، عشان كده انا جيت هنا عشان أكل عيش، وبروح في فترة المدرسة وفي الأجازة بشتغل، وساعات بشتغل في وقت المدرسة عشان اجيب مصاريف مدرستي أنا وأخويا الصغير.
واختتم الطفل أيوب حديثه قائلًا: نفسي أخش كلية الحقوق وابقى محامي شاطر، ونفسي في شغلانة شريفة ومرتاحة، عشان اللي أنا فيها دي تعب أوي.
