خراط كفيف: نفسي يبقى عندي ورشة صغيرة ومُنتج ثابت
تحدى السيد سعيد الأمير أحمد، إعاقته البصرية، حيث إنه كفيف ويعمل في إحدى ورش اللحام والخراطة، وتخرج من كلية الآداب قسم تاريخ بجامعة القاهرة، وحصل على العديد من الشهادات في مجال الحاسب الآلي والبرمجة.
وأضاف سعيد: المهنة اللي أنا شغال فيها دي اسمها تشكيل معادن عن طريق المكابس، وتشكيل المعادن دي بتعمل الترابيس والمفصلات والحدايد كلها عامةً، لأنها بتخدم النجارين والحدادين.
أما عن تفاصيل يومه، أوضح الأسطى سعيد: أنا ساكن في مدينة النهضة وبصحى الصبح أركب مواصلات للسيدة عائشة ومن السيدة عائشة لحد سوق السلاح، وبعدين بركب توكتوك يدخلني لحد الورشة.
كما أشار إلى بدايات عمله بالخراطة والحدادة فقال: خالي الله يرحمه هو اللي كان موجود هنا في الورشة لما بدأت أشتغل، وكان بيخاف عليا وبيخلني أعمل حاجات بسيطة، وبعد كده بقيت أشتغل على المكنة اللي بتخرم الصاج.
أكمل الأسطى سعيد حديثه قائلًا: أنا بتعامل مع المكنة بحكم خبرتي معاها، ومن صوتها بعرف إذا كانت طالعة ولا نازلة، وبعرف إذا كنت هدوس على الدواسة ولا لا.
واختتم سعيد الأحمد حديثه قائلًا: أنا هحقق كثير في المهنة دي بس تجيلي الفرصة، وعندي استعداد أشتغل وأنتج للدولة، ونفسي يبقى عندي ورشة صغيرة ومُنتج ثابت.
