التعدي على فتاة حتى وفاتها بالإسكندرية.. ووالدها: لقيت بنتي مضروبة بآلة حادة
شهدت محافظة الإسكندرية واقعة التعدي على فتاة تبلغ من العمر 14 عامًا، وتُدعي سلمى، وتم العثور على جثتها ملقاه أمام مقابر خورشيد.
وقال أحمد والد سلمى: أنا أتفاجأت أن المباحث بتتصل بيا وبتقولي إنت عندك بنت اسمها سلمى قولتلهم أه، قالولي طب هي فين قولتلهم عايشة مع والدتها لأني منفصل عنها، وسألوني بقالك قد إيه مشتوفتهاش قولتلهم بقالي نحو 4 أيام، وبعدين قالولي إحنا عاوزينك في كلمتين، ولما روحت القسم قالولي البقاء لله بنتك لقيناها مرمية عند ترب خورشيد، وبنستدل عليك عشان تتعرف عليها إذا كانت هي ولا لا؟
وتابع والد سلمى حديثه قائلًا: روحنا المشرحة أنا ووالدتها عشان نتعرف عليها ولقيتها بنتي، وشها وجسمها وارمين زي ما يكونوا بيعذبوا في كافر، مش عارف عملوا فيها ليه كده، ووشها كأنه مضروب بآلة حادة.
واختتم والد الطفلة تصريحاته: لما اتعرفنا عليها بعد 4 أيام قالولنا إحنا مسكنا الـ 3 عيال اللي ارتكبوا الجريمة، بس ظابط المباحث مرضاش يعرفني بيهم، وأنا مش عارف هما عملوا فيها كده ليه، ولما أنا بنتي يحصل فيها كده بنت مين تاني هيحصل فيها كده.
