بائعة مناديل تعول أسرتها بالدقهلية: مفيش مصدر دخل لينا ولا حاجة تسندنا

قالت السيدة أم مها، بائعة المناديل في إحدى الأسواق، من شارع سكة الإسعاف، في محافظة الدقهلية، إنها متزوجة ويعاني زوجها من عجز في يده، ولديها 4 أولاد، وهي التي تتحمل مصاريفهم جميعًا.

وأضافت أم مها: أنا بفرش بشوية حاجات في الشارع، والحياة مش مساعدة والدنيا ضيقة خالص، ومافيش مصدر دخل ولا معاش ولا أي حاجة تسندنا، حتى البضاعة اللي ببيعها في الشارع مبتجبش حتى حق الأكل.

وتابعت حديثها: أنا ساكنة بـ 700 جنيه، وعاوزة حد من المسئولين يجي يشوف الغلابة اللي الناس دايسة عليهم خالص، الناس الغلابة دول مش عارفين يعيشوا بس حامدين ربنا على أي حاجة.

كما أوضحت بائعة المناديل: ولادي كلهم طلعتهم من المدرسة بسبب المصاريف، ونفسي يبقى في حاجة ثابتة أقعد بيها أبيعها، أو حد يساعدني بشغل أو في حق الإيجار.

واختتمت البائعة أم مها حديثها قائلة: أنا عاوزة حد يساعدني في اللي أنا فيه، أنا مش طالبة كثير، ياريت الناس بس تبص للناس الغلابة، ويساعدونا بحاجة في الإيجار أو في الشغل، أنا مش حمل إني أدفع 700 جنيه إيجار في الشهر، ده غير النور والغاز، أحنا من طبقة الناس اللي بتبقى ماشية جنب الحيط.