عودة التمساح الهارب بأسوان.. وأحد الأهالي: ماتحركش من مكانه لما نزل النيل والشباب جابوه

فوجئ أهالي قرية غرب سهيل، في محافظة أسوان، باختفاء تمساح- من إحدى الشباك المُعدَّة لحجز التماسيح التي يطلب زوار المحافظة والسياح التصوير معهم- منذ صباح اليوم الثلاثاء، بعد أن هرب إلى مياه نهر النيل.

وقال أحد أهالي القرية: كان في واحد بيصوَّر عندنا، وبدل ما يمسك التمساح؛ خاف منه، رغم أنه تمساح صغير، والتمساح بيشم ريحة النيل، وجري عليه، وعشان أطمن الناس؛ دي مش أول مرة يحصل عندنا كده.

وعن حالة التمساح الهارب، قال أحد أهالي القرية: التمساح لما هرب ونزل النيل؛ متحركش، ودي المرة الثالثة اللي يروح فيها نفس المكان.

وأضاف: الشبكة اللي بنحط فيها التمساح الكبيرة؛ بتبقى متبرشمة ومستحيل يطلعوا منها، لكن الشبكة بتاعة التمساح الصغير بتبقى مفتوحة شوية، والمصريين والأجانب لما بيبقوا هنا؛ بيطلبوا إنهم يمسكوا التمساح الصغير ويتصوروا معاه.

وتابع أحد أهالي قرية غرب سهيل، حديثه: الشباب في البلد هنا قالوا إنهم لازم يجيبوا التمساح اللي هرب ده، وفعلًا نزلوا وجابوه ورجعوه مكانه تاني، عشان أصحاب التمساح مكانوش موجودين لما هرب. 

فيما أشار أحد أهالي قرية غرب سهيل، إلى بعض الشائعات المنتشرة عن التماسيح، وقال: الناس فاكرين إن التمساح شرس وبيهجم على الناس وياكلهم، بس لأ، التمساح مبيعضش الناس؛ إلا لما تيجي عند البيضة بتاعته أو عياله.

وواصل أحد أهالي القرية: احنا بنطلع بحيرة ناصر، وبنعوم في وسط التماسيح عادي؛ لأنه طبيعي شبعان من السمك، وهو أصلًا مابياكلش كل يوم، وعنده بيات شتوي، بيقعد 3 شهور مابياكلش.