لايف | سيدة بالنهضة تستغيث: طليقي خطف بنتي ومسكها مطواة وقالي ده مستقبلها

قالت السيدة دعاء، مقيمة بمنطقة النهضة، إن طليقها أقبل على خطف ابنتها الطفلة التي تبلغ من العمر عام ونصف، لافتة إلى أن زوجها لا يتكفل بمصاريفها ومصاريف ابنتها.

تفاصيل خطف الطفلة

وأوضحت السيدة دعاء قائلة: أنا كنت مدياله الأمان وبخليه يجي يشوف بنتي، وفي يوم قالي أنا هنزل أجيبلها حاجات من تحت العمارة، راح خدها ومشي، وأنا لحد دلوقتي ماعرفش عنها حاجة بقالي سنتين، مش عارفة بنتي عايشة ولا ميتة ولا هي فين أصلًا، وطليقي مش بيرد عليا لما بكلمه.

كما أضافت السيدة دعاء، أن طليقها كان يعمل في مجال تجارة الكلاب، وعلى الرغم من ذلك فكان لا يتكفل بمصاريفها أثناء فترة زواجهم، حتى لم يتكفل بمصاريف متابعتها عند الطبيب أثناء حملها في ابنتها.

معاناة السيدة دعاء مع طليقها

وتابعت حديثها قائلة: كان عامل للكلاب اللي بيتاجر فيها عشة في الأوضة عندي وكان بيخليني أخدم عليهم وأنضفلهم مكانهم، وكان معيشني في عذاب وضربني أكتر من مرة، وكمان هو بيتعاطى المخدرات وخلاني أبيع الذهب بتاعي كله عشان يصرف على الكلاب وعلى مزاجه.

بينما استغاثت السيدة دعاء، من أجل معرفة مكان تواجد ابنتها وعودتها إليها مرة أخرى، لافتة إلى أنها حتى لا تستطيع أن تتحدث معها هاتفيًا، وأضافت: أنا مش بقول غير يارب، أنا طالبة بس إن بنتي ترجعلي، وكلمت أهل طليقي استنجد بيهم قالولي إحنا مانعرفوش ومش راضيين يعترفوا بيه عشان هو بلطجي ومتسول، ولما طلبت في مرة صورة لبنتي بعتلي صورتها وهي ماسكة مطواة وقالي هو ده مستقبل بنتك.