شقيق شاب المنوفية المقتول على يد أصدقائه: ضربوه لحد ما مات ودفنوه وصبوا عليه أسمنت| فيديو

شهد مركز شبين الكوم بمحافظة المنوفية، مقتل شاب صاحب شركة توريدات ودفنه أسفل صبة أسمنت، على يد 6 أفراد وهم شركاؤه في العمل، مدعين بعد أن تم القبض عيلهم أن سبب ارتكابهم الجريمة أنه أخد منهم مبلغ مليون و250 ألف جنيه مصري. 

وقال شقيق المجني عليه: زوجته اتصلت بينا يوم الجمعة، تسأل لوحد يعرف حاجة عن تامر، لأنه مختفي من يوم الخميس، وآخر حاجة قالتها إنه خارج مع علي صاحبه وهيتأخر، بعد كدة تليفونه اتقفل.

واستكمل شقيق المجني عليه: روحنا نعمل محضر، وزوجته استبعدت إن علي  يكون له يد في اختفاء تامر ورفضت تتهمه وقالت ده صاحبه مستحيل يؤذيه.

تفاصيل الجريمة 

وعن تفاصيل القضية قال شقيق المجني عليه: خدوه في شقة وضربوه ضرب مبرح، لحد ما مات، وبعدين رموه من العمارة، وبواب العمارة قال إنه اترمى قدامه وكان متكتف وفيه لزق على فمه، وكان لسه صاحي.

أما عن إخفاء الجثمان، أوضح شقيق المجني عليه، أن المتهمين بعد أن ألقوه من العقار، أخذوه في سيارة، وذهبوا إلى منزل في قرية كفر دقماق، وحفروا في الأرض وألقوا الجثمان ثم صبوا الأسمنت والخرسانة. 

اكتشاف الجريمة 

وعن اكتشاف التفاصيل الواقعة، فقد اعترف المتهمين خلال التحقيقات أمام النيابة، بارتكابهم الواقعة، وذهبت قوة أمنية واستخرجت جثمان تامر المجني عليه بعد مرور أكثر من 5 أيام من يوم قتلة. 

واختتم شقيق المجني عليه حديثه: أنا بطالب بالإعدام، لإن اللي اتعمل في تامر ده حرام، هو ما سرقش حاجة وكانوا بياكلوا مع بعض ويشتغلوا مع بعض، أنا مش عايز غير حق أخويا.