احتجاز سيدة داخل فرع تويوتا بالعباسية ومنع دخول باقي العملاء المتضررين: اضربت علشان بطالب بحقي │ بث مباشر

احتجز موظفو فرع تويوتا إيجيبت فرع العباسية، سيدة من العميلات المتضررات من تأخير سياراتهم اليوم، حيث رفضوا خروجها من الفرع، وذلك بالتزامن مع تجمع العشرات من المتضررين أمام فرع شركة تويوتا إيجيبت فرع العباسية، اعتراضًا على تأخير تسليم سياراتهم، وكذلك مطالبة الوكيل بسحب مبلغ الحجوزات لعدم توافر السيارات، بالإضافة إلى إجبار العملاء على دفع سعر السيارات بالدولار الأمريكي بدلا من الجنيه.

استغاثة عملاء تويوتا إيجيبت فرع العباسية

وقالت السيدة المحتجزة منهارة: أنا جيت حجزت عربية زي أي مواطن، وحجزت العربية وكانوا بيقولولي بـ 370 ألف جنيه، ودلوقتي بيقولولي بـ 470 ألف جنيه ووافقت علشان استلم لأن إحنا بقالنا سنة مذلولين، وبنيجي من محافظات بعيدة علشان نستلم.

وتابعت السيدة: الموظف قالي عايزة تستلمي تجيبي 20 ألف دولار، قولتله أجيبلك دولار منين؟ قالي إن كان عاجبك مش عايزة متستلميش، في غيرك بيدفع وهياخد، مضيفة: عاملين مزاد على عربيتي وأنا واقفة.

واستكملت السيدة: جينا وقفنا قدام الباب وكنا عاوزين ندخل ضربونا وحبسونا جوه التوكيل، وضربوا الرجالة وحبسوهم، وإحنا هنا محبوسين ومعانا أطفال صغيرة، وإحنا مش جايين نعمل مشكلة.. إحنا جايين نطالب بحقنا.

وأضافت السيدة: رئيس التوكيل بيقولنا اللي انتو عايزينه اعملوه.. ملكوش حاجة عندي، واللي مش معاه يدفع بالدولار يمشي.. حسبي الله ونعم الوكيل فيهم.. بقالنا سنة بيقولولنا نفس الكلام، وهما نصبوا علينا في أموالنا.. اتحجزت واضربت علشان بطلب حقي.