مسنة بالقليوبية تستغيث من جحود أبنائها: ولادي رموني وعايشة في الشارع.. ونفسي في مكان يأويني | بث مباشر

استغاثت الحاجة نحمدة، من قرية ميت نما بمحافظة القليوبية، بعد طرد أولادها لها في الشارع، حيث أصبحت تفترش الرصيف بلا مأوى في شوارع القليوبية.

الحاجة نحمدة تروي تفاصيل مأساتها وجحود أبنائها

قالت الحاجة نحمدة، إن لديها 4 أبناء، منهم فتاة لا تعلم عنها شيئا، وأولادها الشباب الثلاثة طردوها في الشارع بلا مأوى، معقبة: زوجاتهم مش عايزيني أقعد في البيت، وولادي طردوني في الشارع، بعد ما تعبت معاهم، ووهبت حياتي كلها لهم.

وأضافت: اشتغلت في البيوت علشان أقدر أبني لهم الشقق والبيوت اللي هما قاعدين فيها، معملتش معاهم حاجة غلط أبدا، لي بيعملوا فيا كدا؟، أنا عايزة ولادي جنبي وياخدوني في حضنهم، نفسي أسمع من ولادي كلمة ماما، دي أخرتها يرموني علشان خاطر زوجاتهم.. عمري ما عملت فيهم حاجة وحشة.

وتابعت: الناس الغريبة بتعطف عليا وولادي راميني في الشارع، الناس الغريبة بتخاف عليا وولادي عمرهم ما خافوا عليا.. ولادي عمرهم ما عطفوا عليا، لا في عيد أم ولا في أي حاجة.

واستكملت الحاجة نحمدة: أنا مش طالبة حاجة، بس بتصعب عليا نفسي لما الغريب يعطف عليا وولادي لا.. أنا عايزة أي حاجة تسترني، ونفسي أعيش في أوضة، أحس إني ليا مكان أعيش فيه.. أنا عايشة بعطف الناس عليا وقاعدة وبنام في الشارع، والناس بيجيبولي الأكل ويشربوني ويكرموني ويسألوا عني وولادي معملوش كده.