أسامة الهادي: اتعلمت من صبري فواز اللي ممكن اتعلمه في 30 سنة
تحدث الفنان أسامة الهادي عن كواليس مسلسل وبينا ميعاد، والذي عُرض منذ فترة، كما أشاد بالفنان صبري فواز، مشيرًا إلى دعمه ونصائحه الدائمة لشباب المسلسل.
وقال أسامة الهادي خلال ندوته مع القاهرة 24: قبل ما نبدأ تصوير، المخرج هاني كمال جمعنا إحنا الشباب عشان نتعرف على بعض ونعرف نشتغل مع بعض، وأنا عن نفسي حسيت من الأول إن إحنا هيبقى في بينا مشاعر طيبة وحقيقية، وإحنا واقفين قدام الكاميرا حتى لو إحنا بنمثل.
وتابع أسامة حديثه قائلًا: ولما بدأنا تمثيل، كنت في البداية خايف ومتوتر بس بدأت ارتاح، ولما أستاذ هاني عرف إزاي يتعامل مع الممثل وهو عارف إنه ده أول يوم تصوير ليه، واكتسبت من أستاذ صبري خبرة كان ممكن اكتسبها لو قعدت أشتغل 30 سنة مثلًا.
واختتم أسامة الهادي حديثه مشيدًا بالفنان صبري فواز، قائلا: أستاذ صبري كان بيساعدنا كتير جدًا، وكنا بنتجمع في أوضته ونقعد نراجع المشاهد، وكان له توجيهات بتحسن من المشهد وكان في مشاعر طيبة طول الوقت بتزق الواحد إنه يكون على قدر الحدث اللي إحنا فيه.
على جانب آخر، تحدث الفنان صبري فواز عن دور الفنانة شيرين رضا، في مسلسل وبينا ميعاد، حيث قال: شيرين رضا تعبت إنها تروح لـ نادية أكتر مني لأن شخصية حسن تشبهني بشكل كبير، وبتعامل زيه في الحياة والمجهود اللي كنت ببذله كان في التواصل مع الزملاء، وبحاول أفيدهم عشان يحسوا بالدور.
مسلسل وبينا ميعاد
يذكر أنه يشارك في مسلسل وبينا ميعاد العديد من الفنانين، أبرزهم الفنانة شيرين رضا، صبري فواز، داليا شوقي، أسامة الهادي، يوسف الكدواني، تسنيم مطر، آية سليم، وفاء صادق، محمد سليمان، وآخرين، وهو من تأليف وإخراج هاني كمال.
