محمد حفظي: فيلم رحلة 404 جريء.. وعملت أسوار القمر في 10 سنين
كشف المنتج محمد حفظي، تفاصيل تحضيرات فيلم رحلة 404 بطولة الفنانة منى زكي، مؤكدًا أنهم تمسكوا برؤيتهم للعمل.
وقال محمد حفطي على هامش حضوره العرض الخاص لـ فيلم 404: اللي حمسني لـ فيلم رحلة 404 طبعًا الورق والقصة نفسها فريدة جدًا والصراحة جريئة وإيجابية جدًا، مصاعب متتالية لغاية ما توصل للقاع وبتنتهي نهاية فيها قدر كبير من الأمل والشجاعة، فيلم صادق جدًا ومكتوب باحتراف كبير.
وتابع: اللي بيشجع أي حد أن لما يلاقي فيلم مكتوب زي كده وعليه مخرج زي هاني خليفة ونجمة زي منى زكي، مشروع يعني طبيعي أن الواحد يبقى مهتم بيه، وكمان أنا قرأت الفيلم ده من 2016 وبعدها بـ 5 سنين قررت انتجه، لما جالي كم خلال شركة الإنتاج اللي عندها حقوق السيناريو، وكان رحلة طويلة.
وأضاف محمد حفظي: إحنا بدأنا نحضر للفيلم في 2021، وصورنا في بداية أكتوبر 2021 وخدنا وقت كبير، واللي أخد وقت كبير هو المونتاج والنقاش مع الرقابة في مراحل مختلفة، والحقيقة أننا عمرنا ما يأسنا وكنا متمسكين بالرؤية بتاعتنا واتقدمت بالشكل اللي يعبر عنها.
محمد حفظي: فيلم رحلة 404 اتصور في 3 سنين
وعن أسباب توقف تصوير فيلم رحلة 404، فعلق محمد حفظي قائلًا: تصوير الفيلم خد وقت كتير بس كان في وقفات كتير في النص بسبب انشغال الفنانين، وإحنا توقفنا لأسباب مختلفة وعلشان نجمع الكاست تاني خدنا وقت كبير، ولكن كنا صورنا حوالي 80% من الفيلم، وكل الأفلام بتاخد وقت يعني أنا قعدت أعمل فيلم أسوار القمر 10 سنين، والرحلة 404 خد 3 سنين من عمري ولكن كانت رحلة ممتعة.
أبطال فيلم رحلة 404
يشارك في فيلم رحلة 404 عددا كبيرا من النجوم ومن أبرزهم منى زكي، محمد ممدوح، محمد فراج، شيرين رضا، خالد الصاوي، وغيرهم من الفنانين، والعمل من تأليف محمد رجاء وإخراج هاني خليفة، وتدور أحداث العمل في إطار تشويقي حول غادة التائهه بين الرجوع للخطيئة والتوبة.
