فتاة التجمع ضحية سائق أوبر في التحقيقات: مسكني من جسمي وضربني وقعدت أقوله عندي عيال| بث مباشر

ينفرد القاهرة 24 بنص التحقيقات الخاص بواقعة فتاة التجمع، المدعوة نبيلة ع، والمتهم بخطفها سائق أوبر والتعدي الجنسي عليها وتهديدها بالقتل وإصابتها في يدها بأداة حادة خلال شهر مايو الماضي.

فتاة التجمع ضحية سائق أوبر في التحقيقات

وجاء في نص التحقيقات أن المدعوة نبيلة عواد قالت إنها قبل الواقعة كانت عند شقيقتها التي تدعى سعاد وشهرتها سالي، وإنها كانت ذاهبة إلى فرح في new giza بالشيخ زايد في أكتوبر، ولكن لم يكن لديها أموال كاش فطلبت من شقيقتها أن تطلب لها uber من حسابها الشخصي.

وأضافت ضحية سائق أوبر بالتجمع أن السيارة جاءت بالفعل وركبت فيها، لكنها فوجئت بعد تحرك السيارة بحركات غريبة من السائق ثم طلب منها أن تلغي الرحلة من على البرنامج وتحول له الأموال على حسابه بفودافون كاش.

وتابعت ضحية سائق أوبر: نزل وفتح باب الشنطة وبعدين اتأخر شوية، فحسيت إن حاجة غربية بتحصل، فقومت لميت الشنطة بتاعتي وبفتح باب العربية علشان أنزل، وبعدين بدأت أنزل رجلي من العربية لقيته جه وماسك في إيده سلاح حاد بيقولي ده كتر ويقولي اهدي اهدي، ويزعق وهو بيقول لو مش بطلتي صويت هقتلك.

وأضافت نبيلة فتاة التجمع: أنا ساعتها قولتلوا اقتلني بس مش هتعمل معايا حاجة لأنه شد هدومي وكان عمال يمسكني، وأنا كنت بدافع عن نفسي وماسكة بإيدي السلاح اللي في إيده وكان بإيده الثانية عمال يمسكني من جسمي ويضربني على وشي ورأسي ويشدني من شعري، وأنا أصوت وأقوله حرام عليك أنا عندي عيال قعد يشتمني بيقولي اهدي، ولزق فيا لحد محاولت أفتح باب العربية اللي ورايا وأزحلق نفسي بره باب العربية اللي ناحية الطريق.

واستكملت: كان في صوت عربيات بدأت تيجي فهو قام شاددني من رجلي علشان يدخلني جوة العربية، وساعتها علشان هو حس أن أبواب العربية اللي وراء كانوا مفتوحين، رمالي الحاجة بتاعتي برا، فأنا نزلت من العربية وطلعت أجري برة العربية، وبعدين هو ركب العربية وطلع جري، وكانت ساعتها الدنيا صحراء وفي ظلام.