كيشو بعد براءته وعودته لمصر: الناس خذلوني ورد فعلهم صدمني.. وهقاضي كل من شوه صورتي| فيديو

عاد محمد إبراهيم كيشو، لاعب منتخب المصارعة، إلى مصر اليوم الأحد 11 أغسطس 2024، وذلك عقب الإفراج عنه وبراءته من اتهامه بالتحرش بفتاة فرنسية، خلال مشاركته في أولمبياد باريس 2024.

تعليق كيشو على أزمته في باريس

وقال كيشو: تفاجأت بردود وكلام الناس عليا.. حتى إنهم مستنوش الحقيقة تظهر وحكموا عليا على طول بس الحمد لله ربنا ظهر الحقيقة.. والشرطة الفرنسية هي اللي أكدت الكلام ده مش أنا.

وتابع: لو كان فيه شك 1% عند الشرطة الفرنسية مكنش زماني وصلت مصر.. ولكن الحمد لله ربنا كبير وظهر براءتي.. ولكن بصراحة أنا مضايق من ردود الأفعال اللي في مصر.. وهيتم مقاضاة كل من شوه صورتي من غير ما يعرف الحقيقة.

وأضاف كيشو: أنا طول السنة يعتبر عايش في أوروبا وبنزل مصر إجازات.. يعني عارف القوانين كويس هناك ومستحيل أعمل حاجة زي كده.. وأخلاقي كـ مصري متسمحليش أعمل كده وحسبي الله ونعم الوكيل.

واستكمل: السفير المصري وعدني برد اعتباري.. والأدلة والتحاليل أثبتت براءتي وأنا واثق في نفسي وأخلاقي.. وأكتر ناس خذلتني هنا في مصر ولكن فيه ناس متعرفنيش وقفت جنبي.