والد أحمد الجندي بعد ذهبية أولمبياد باريس: كان نفسه يرفع علم مصر وربنا حقق حلمه| بث مباشر
أعرب والد البطل الأولمبي أحمد الجندي، عن سعادته بتتويج نجله بالميدالية الذهبية، في الخماسي الحديث، في دورة الألعاب الأولمبية باريس 2024.
تصريحات والد البطل الأولمبي أحمد الجندي
وقال أسامة الجندي: الحمد لله على فضل ربنا أولًا وأخيرًا.. ربنا كلل مجهود أحمد وتعبه في الفترة الأخيرة دي أنه قدر يحقق أغلى ميدالية رياضية اللي هي الميدالية الأولمبية الذهبية.
ووجه والد البطل الأولمبي أحمد الجندي، الشكر إلى جميع من ساندوا نجله ودعموه خلال مشاركته في دورة الألعاب الأولمبية باريس 2024.
وتابع: الموضوع مش بيبقى سهل ومش بيخلص في ساعة ولا ساعتين.. أحمد قعد 3 أيام يلعب وكل لعبة طبعًا بيبقى ليها تأثيرها.. وربنا أكرمه وعمل نتيجة هايلة في السلاح.. أما في الفروسية فـ الناس شافت اللي حصل في نصف النهائي ولكن الحمد لله أحمد مسك نفسه وقدر يعدي.
كما أضاف أسامة الجندي: أحمد دلوقتي بيفضي دماغه من اللي حصل في السنين اللي فاتت.. لأنه كان عندنا 3 سنين صعبة شوية خصوصًا أنه كان عنده إصابة بعد أولمبياد طوكيو ورجع مصر على العلاج على طول.. يعني الفترة اللي فاتت بالنسباله كانت صعبة.
واستكمل: أحمد بيفرح دلوقتي بالميدالية اللي حققها والحلم اللي كان بيحلم بيه.. وخصوصًا أنه بعد أولمبياد طوكيو كان بيحلم يرفع علم مصر في طابور الأولمبياد وربنا حققله الحلم ده الحمد لله.. وإن شاء الله هنرجع مصر بكرة بليل.
