فتاة تكشف تفاصيل اعتداء لاعب الأهلي السابق على والدها: كسر رجله وبيجيله تشنجات من الوجع | فيديو

نشرت فتاة تدعى فرح مصطفى، مقطع فيديو عبر منصات التواصل الاجتماعي في الآونة الأخيرة، إذ كشفت تعدي الكابتن أحمد عادل، لاعب النادي الأهلي السابق، على والدها بالضرب ما أدى لتعرضه إلى كسور وجروح خطيرة في جسده.

لاعب الأهلي السابق يتعدى على أحد الأشخاص بالساحل الشمالي

وقالت فرح مصطفى: بابا وإخواتي الصغيرين كانوا في مارينا.. وأخويا علي الصغير كان بيلعب وابن اللاعب أحمد عادل جه رخم عليه وضايقه.. ولما أخويا قاله انت بتضايقني ليه رد عليه وقاله هو كده وخربشه في راسه.. وأخويا التاني اتدخل عشان يدافع عنه راح شتمهم بألفاظ وحشة.

وأضافت: بابا شاف الخناقة وجه وقال لابن اللاعب أحمد عادل روح لـ باباك خلاص وإحنا مش عاوزين مشاكل.. وبعدها بابا وإخواتي كانوا بياكلوا في مطعم ولقى صاحب المحل بيقوله في واحد عاوزك برا.. ولما طلع لقى اللاعب أحمد عادل بيقولوا انت ولادك شتموا ابني.. بابا قاله لأ محصلش والموضوع خلص وابني أنا اللي متعور أصلًا.

وأضافت فرح مصطفى: اللاعب أحمد عادل كان بيكلم بابا وحش وبيزقه بإيده.. فـ بابا قاله بلاش نتكلم كده إحنا كبار ومش عاوزين نزعل من بعض.. وبعدين ضرب بابا في وشه ومناخيره نزلت دم.. وفجأة بابا لقى 4 ستات ماسكينه من إيده ورقبته وأحمد عادل ضربه في رجله وجابله كسر مضاعف.

واستكملت: الناس طلبوا الإسعاف لـ بابا ونقلوه المستشفى وعمل عملية وركب 9 مسامير وشريحتين وحالته النفسية متدمرة.. والدكتور قالنا إنه عنده تشنجات وبيصرخ من كتر الوجع.. وإحنا اتخذنا الإجراءات القانونية وعملنا محضر.. ومش عاوزين حاجة غير إننا ناخد حقنا.