قالولي كل الناس بتتعاكس.. أقوال شقيق زوجة إمام عاشور في التحقيقات | بث مباشر

أدلى شقيق ياسمين حافظ، زوجة إمام عاشور لاعب النادي الأهلي، بأقوالها أمام جهات التحقيق، وذلك على خلفية اتهامه بالاعتداء على فرد أمن في مول أركان بمنطقة الشيخ زايد، بعد تعرض شقيقته للمضايقة والمعاكسة على يد عدد من الأشخاص داخل المول.

واقعة زوجة إمام عاشور

وقال عمر شقيق زوجة إمام عاشور: اللي حصل إن أنا كنت رايح السينما مع أختي ياسمين ومعاذ أخويا ومراتي وأخت مراتي.. ولما دخلنا سينما أركان في الشيخ زايد لقيت معاذ أخويا الصغير بيبص يمين وشمال وبيبص وراه ولقيت أختي متوترة.

وتابع: سألتهم في إيه أختي ياسمين قالتلي إن فيه شباب عاكسوني وضايقوني بالكلام.. وسألت أخويا هما فين قالي معرفش هما في القاعة ولا لأ.. ساعتها لقيت إمام عاشور بيتصل بيا وبيقولي خلي معاذ يهدى وميعملش حاجة.. وقولوا لـ بتاع الأمن يتحفظ عليهم لحد ما ييجي ونعمل محضر.

واستكمل شقيق زوجة إمام عاشور: أخدت معاذ أخويا بعد الفيلم وقولتله هما فين شاورلي على ناس.. روحت واتكلمت معاهم وقولتلهم كان معاكم واحد لابس جلابية.. فضلوا يتريقوا وبعدين في نفس اللحظة قابلت بتاع الأمن قدام الكافيه اللي قبل نزلة الباركنيج في المكان.. وقولت لـ بتاع الأمن الشباب عاكسوا اختي ردوا عليا بعدم اهتمام وقالوا إحنا في عيد وكل الناس بتتعاكس.

وفي ذات السياق، أصدرت جهات التحقيق بالجيزة، قرارًا يفيد بإحالة إمام عاشور لاعب النادي الأهلي، إلى المحاكمة على خلفية اتهامه بالتعدي على فرد أمن داخل مول شهير بالشيخ زايد، وحددت جلسة 5 أكتوبر لعقد أولى الجلسات.