سيدة تستغيث من شركة محمول: باعوا شريحة موبايل ببطاقة ابني المسروقة.. والمتهم استخدمها في جريمة| بث مباشر
اتهمت إحدى السيدات شركة اتصالات شهيرة ببيع شريحة هاتف محمول إلى مجهول، وذلك عن طريق البطاقة الشخصية لنجلها المسروقة، إذ استخدمها هذا الشخص المجهول في ارتكاب جريمة ابتزاز إلكتروني، مما أدى إلى القبض على نجلها نظرًا لأن الشريحة مسجلة باسمه.
سيدة تستغيث من شركة اتصالات شهيرة
وقالت السيدة إن تفاصيل الأزمة بدأت عندما تمت سرقة البطاقة الشخصية لنجلها، ثم قام السارق بالتوجه إلى فرع لإحدى شركات الاتصالات الشهيرة واشترى خط هاتف محمول من خلال البطاقة.
وتابعت: بطاقة ابني اتسرقت وإحنا عارفين مين اللي سرقها.. راح خد البطاقة وطلع بيها شريحة من شركة اتصالات.. أنا مش عارفة إزاي قدر يشتري شريحة ببطاقة ابني مع إن الشخص مش هو هو.. يعني إزاي الموظف باع للشخص ده شريحة الموبايل وهو مش نفس الشخص اللي في البطاقة!
وأضافت السيدة أن الشخص الذي اشترى الشريحة قام بإرسال رسائل إلى رقم آخر تابع له تحتوي على عبارات جنسية غير لائقة، وقالت: اللي اشترى الخط ببطاقة ابني معاه حد تاني بشريحة موبايل باسم واحدة ست.. فـ بعت ليها عبارات جنسية وتهديدات وابتزاز.. وبعد كده راحوا قدموا شكوى في مباحث الإنترنت.
وأوضحت أن بعض الفحص من جانب مباحث الإنترنت تبين أن الشريحة مسجلة باسم نجلها، وبالتالي تم إلقاء القبض عليه بتهمة الابتزاز الإلكتروني والتهديد.
واستكملت: لما ابني اتقبض عليه وتواصلنا مع الشركة عشان يجيبوا العقد بتاع الخط قاله إنه مش موجود على السيستم وحتى العقد الورقي مش موجود.. وبعدين لجأنا للمركز القومي لتنظيم الاتصالات وبالفعل جاب العقد واتأكدوا إن الخط كان مسروق من ابني.
وأشارت السيدة إلى نيابة التجمع تولت التحقيق في هذه الواقعة، وبدورها أحالت نجلها إلى المحاكمة التي خلصت إلى براءته من التهمة المنسوبة إليه، وذلك بعد التأكد من سرقة بطاقته الشخصية، مختتمة: ابني خد براءة وخرج من الحبس بس بعد ما مستقبله اتدمر من اللي حصله.. واللي عملوا فيه كده ناس نعرفهم واستغلوا إن فيه خلافات بيننا.
