أسرة عبد الحليم حافظ تنشر جوابًا لأول مرة يكشف حقيقة زواجه من إحدى المشاهير | بث مباشر

كشفت أسرة عبد الحليم حافظ، حقيقة زواجه من إحدى المشاهير عن طريق نشر بعض المستندات لأول مرة؛ وذلك من أجل الرد على اللغز الذي كان يتساءل عنه الكثير من الجمهور خلال السنوات الماضية.

أسرة عبد الحليم تكشف حقيق زواجه من إحدى المشاهير

وكتب عبد الحليم الشناوي، حفيد شقيقة عبد الحليم حافظ، منشورًا عبر حسابه الشخصي على موقع التواصل الاجتماعي فيس بوك، يتضمن البيان الرسمي مرفق بجواب من حبيبة العندليب، والذي كتبته له عقب انتهاء علاقتهما.

وجاء البيان كالآتي: عدى على وفاتك يا حليم حوالي نصف قرن والناس لسه بتسأل هل الإشاعة عن جوازك حقيقية ولا لاء؟ يا حليم أنت أعظم واحد غنيت للحب ومن وجهة نظري ده كان بسبب حرمانك منه من أول حب الأم اللي اتحرمت منه يوم ولادتك لحد الحرمان من حب الزوجة والأبناء، عشان في ناس كتير بتحب تتشهر وخصوصا لما أضواء الشهرة عندها بتقل وتتطفي فيجيبوا سيرتك عشان يرجعوا تاني في دايرة الضوء.

وأضاف: إشاعات كتير طلعت وأنت عايش منها الإشاعات اللي كانت بتقول إنك بتتدعي المرض علشان تنال تعاطف الجمهور، وإن نزيفك على المسرح كان كذب ولما سافرت في آخر رحلة علاج طلعت الإشاعة اللي بتقول إن حليم بيتدعي أنه مسافر لندن للعلاج وهو بيتفسح ويلف العالم، ورجعت بعدها مصر في تابوت وأخرست ألسنة كل اللي كانوا بيقولوا إنك بتمثل وبتتدعي المرض.

واستكمل البيان: وإشاعة الجواز اللي طلعت بعد وفاتك بـ 17 سنة من ناس المفروض إنهم كانوا أصدقائك واستمرت الإشاعة بدون أي مستند أو دليل، وكان نفسي ألاقي حاجة تنفيها بدليل قاطع، أنا كنت عارف ومتأكد إنك ماتجوزتش لأنك كنت عايش لأهلك وفنك، ومرضك خلاك تخاف تتجوز وتظلم معاك زوجة وأبناء وكفاية عيلتك اللي عاشوا معاك قساوة مرضك، وده اللي أكدتهولي أمي وقبلها جدتي علية الله يرحمهم ويحسن إليهم.

وواصل: وإحنا كأسرة عمرنا ما جرينا ورا تريند أو شهرة زائفة أو تاجرنا بأخبار كاذبة وبنحترم نفسنا وبنحترم جمهورك العريض في العالم كله ومحبيك، وبنلتزم الصمت وبنحاول دايما نحافظ على سمعة وسيرة الأسرة الطيبة، ولما بنتحدث أو بننفي أي إشاعات أو أخبار لازم يكون معانا دليل أو حاجة تثبت صحة كلامنا، للحفاظ علي مصداقية العائلة وحب الناس واحترامهم لينا يجبرنا إننا منقولش حاجة إلا لو متأكدين منها بنسبة 100%.

وأردف البيان: وردا على كل الأكاذيب والإشاعات التي طالت حليم وهو في قبرة بين يديّ الرحمن وطالتنا نحن كعائلة وأرهقتنا وأحزنتنا كثيرا لمدة عقود، بقالي فترة طويلة بدور على أي دليل مادي يخرس الألسنة ولكني كنت على وشك أني أفقد الأمل ولكن مؤخرا قررت أحاول محاولة أخيرة، وقررت أنبش في كل الأوراق وفتحت غرفة ملحقة بالمنزل واللي جدتي علية كانت محتفظة فيها بكل الأوراق والمتعلقات الشخصية وحتى التراث الفني لحليم، وطبعا بما إنك أنت سايب إرث كبير من مقتنيات، جوابات، مستندات وصور وحاجات ممكن أقعد سنين طويلة أدور فيها موصلش لحاجة.

واستطرد: ومن يومين بس وأنا بقلب في جواباتك الشخصية وبقراها بتمعن لقيت جواب مرسل لك بخط يد السيدة اللي بعض الأشخاص أشاعوا إنك اتجوزتها، سطور قليلة في صفحة واحدة فيها رد على إشاعات بقالها 31 سنة والناس بتتكلم عنها لحد النهاردة، هذا الخطاب أرسلته السيدة الفاضلة لحليم بعد أن قرر حليم إنهاء علاقة الحب التي كانت في بدايتها، ونحن كعائلة لم ننكر أبدا أنه كان بينهما بداية قصة حب بريئة ومحترمة لم تكتمل، وحليم قرر إنهاء تلك العلاقة لأنه لم يكن في ارتياح، وأصبحت العلاقة بعد ذلك مجرد علاقة صداقة وزمالة عمل يسودها التقدير والاحترام من الطرفين.

واختتم البيان: للرد المسبق على كل اللي هيشككوا في هوية صاحبة الجواب، لم يتم نشر الجواب إلا بعد التحقق منه، وتقدروا بنفسكم وبكل سهولة تطابقوا خط اليد للأستاذة الفاضلة مع أي جوابات أو رسائل أخرى لها بخط يدها.