بائع مشروبات يعثر على 120 ألف جنيه ويعيدها لصاحبها في قنا: بشقى على رزقي بالحلال| بث مباشر

عثر شخص يعمل على عربة لبيع المشروبات في أحد شوارع مدينة قنا، على كيس بلاستيكي بداخله مبلغ مالي يقدر بنحو 120 ألف جنيه، ثم ظل يبحث عن صاحبه حتى يتمكن من إعادته له، في موقف يجسد أسمى معاني الأمانة والشرف.

بائع مشروبات يعثر على مبلغ مالي ويعيده لصاحبه في قنا

وقال بائع المشروبات إنه التفاصيل تعود عندما كان يباشر عمله بشكل طبيعي على العربة الخاصة به، وفي نهاية اليوم تفاجأ بالعثور على كيس بلاستيكي بداخله مبلغ من المال.

وتابع: في يوم بعد ما خلصت شغل اتفاجأت لقيت كيس مش بتاعي، فتحته لقيت جواه فلوس حوالي 120 ألف جنيه، افتكرت صاحب الكيس ده وفضلت أدور عليه حواليا بس ملقتوش، فصورت فيديو ونزلته على صفحتي إن فيه واحد نسي فلوسه عندي، وصاحب الفلوس طلع مندوب أجهزة كهربائية ونسيهم وهو بيشتري قهوة من عندي.

وأضاف بائع المشروبات أنه لم يفكر أبدًا أن يأخذ هذا المال أو حتى جزء منه، لأنه يعلم أن هذا ليس من حقه، خاصة أن صاحب المال يشقى على رزقه بالحلال مثله.

واستكمل: مفكرتش لحظة إني آخد الفلوس أو حتى أخد جزء منها، لأن صاحب الفلوس راجل شقيان وعلى باب الله زيه زيي وحرام أطمع فيه، ولما جه ياخد الفلوس كان بيعيط من فرحته لأنه خاف شقاه يضيع.

وأوضح بائع المشروبات أنه اعتبر ما حدث له اختبار من عند الله له، خاصة أنه سيرزق بمولود جديد خلال الأشهر المقبلة، مختتمًا: اعتبرت اللي حصل ده امتحان من ربنا لأن مراتي هتخلف كمان كام شهر، الحمد لله أنا بشقى بالحلال لأن ربنا عمره ما هيبارك أبدًا في الحرام، والحرام لو جه هياخد الحلال ويمشي ومينفعش نطمع في حاجة مش حقنا.