طالب بـ طب أسنان يعمل على عربة ساندوتشات: بحلم بالمشروع يبقى عالمي

بدأ محمد عبد الله، الطالب بكلية طب الأسنان، وعبد العزيز الطالب بكلية الصيدلة، العمل بمشروع عربة طعام بمنطقة المعادي، بعيدًا عن تخصصاتهما العلمية، وذلك لتوفير مصاريفهما الدراسية وتخفيف العبء المادي عن أسرتيهما.   

وقال محمد عبد الله الطالب بكلية طب الأسنان: المشروع ده عملناه كنشاط في يومنا بجانب الدراسة، وبدأنا المشروع بعربية الأكل، واحنا أصلًا بطبيعتنا بنحب نعمل أكلات، وده السبب اللي خلانا نفتح المشروع ده، وباقدر أنظم ما بين وقت التدريب في العيادة، وبين الشغل على العربية.

وأشار طالب طب الأسنان في حديثه، إلى تعدد أصناف الساندوتشات بالعربة قائلًا: عندي ساندوتش اسمه المشرحة، يعني سوسيس على برجر على كام نوع كدة من اللحمة، وفيه الساندوتش اللي احنا معروفين بيه، وهو سندوتش بطاطس شيتوس، وده بيتراوح سعره ما بين 5 جنيه إلى 20 جنيه.

كما وجّه عبد العزيز طالب كلية الصيدلة نصيحته للشاب: أقول لأي شاب ابدأ ومترميش همومك وتستنى الأوضاع المناسبة، لأنك لو استنيت عمرها ما هتيجي.

وعن موقف أسرته من المشروع قال: والدي متأخرش وقالي يلا ابدأ وأنا معاك.

واختتم محمد حديثه قائلًا: باحلم إن المشروع ده يبقى براند عالمي، اسمه دكتور بطاطس، يبقى شعار جديد في مصر كلها والعالم كمان.