شبيهة شخصية لقاء الخميسي في حدوتة حتة من القمر تتعرض للتنمر بسبب الوحمة

قالت الشابة شروق العقدة، والبالغة من العمر 29 عامًا، وهي صاحبة الشخصية الحقيقية لدور الفنانة لقاء الخميسي، في حدوتة حتة من القمر، من مسلسل زي القمر، إنها وُلدت بوحمة باللون الأسود في نصف وجهها.

وأضافت شروق العقدة: الناس فاكرة أن المسلسل معمول عشان خاطر شروق بس لا، المسلسل معمول عشان كل الناس اللي عندهم وحمة في وشهم.

وأوضحت شروق: مش لازم يكون عندك وحمة عشان تبقى مميز أو مختلف بين الناس، ممكن يبقى عندك بهاق أو عندك أي حاجة مميزاك عن غيرك، والمسلسل معمول عشان كده، معمول عشان تعرف ازاي تحب نفسك، وتقدر تتكلم وتنزل وتخرج، وتدور على فرصة حقيقية لشغلك، وعشان البنت متقبلش بأي حد لمجرد أنها عاوزة تتجوز، ودي كانت حاجة عجباني جدًا في المسلسل.

وتابعت حديثها قائلة: من وأنا صغيرة ولحد وقتنا هذا في تنمر بيحصل عليا، بس طبعًا التنمر بيقل شوية مع الوقت، عشان زمان وأنا صغيرة مكانش فيه الوعي اللي موجود دلوقتي.

وعن التعليقات السلبية التي تتلقاها، قالت شروق: أنا أي تعليق سلبي بيجيلي مبياخدش معايا ثانيتين أني اتخطاه وأشيله من دماغي، أي تعليق سلبي بيجيلي بحوله لطاقة ايجابية، ومش بيهمني مين قال إيه، بس أنا أكثر الحاجات اللي بتتقالي إيه ده إيه اللي في وشك ده، وبعد ما الناس بيعرفوا إنها وحمة، بيقولولي هي مامتك اتوحمت علي إيه.

وأردفت شروق: اللي في وشي دي باللغة العامية اسمها وحمة، لكن باللغة الطبية هي اسمها زيادة في صبغة الجلد، بمعنى إن الناس كلها عندها نقطة صغيرة في جسمها بتوزع الصبغة بتاعة الجسم اللي بتدينا لون جسمنا وبشرتنا، فالنقطة دي اتجمعت كلها عندي في مكان واحد، لكن هي مالهاش علاقة بوالدتي كانت بتتوحم بإيه وهي حامل فيا.

وفي نفس السياق، قالت الشابة شروق: أنا التنمر لا يعنيني شيئًا، اللي يقول يقول واللي عايز يعمل حاجة يعملها، أنا مقتنعة بنفسي، ودايمًا بقول لنفسي إن ربنا مابيديش الواحد الحاجة إلا لما يكون عارف أنه قدها، وربنا عارف من ساعة ما خلقني إني قد الوحمة دي، أنا الـ 24 قيراط بتوعي في وحمتي، عشان هي اللي مميزاني.