هدى أشهر سائقة ميكروباص بالقليوبية: أنا عايزة شقة وأي شغلانة أكل منها عيش

استغاثت سيدة تدعى هدى، تعمل سائقة ميكروباص في القليوبية، بالرئيس عبدالفتاح السيسي، قائلة: أنا عندي 59 سنة وأرملة ومقيمة في شقة أوضة وصالة في الخانكة مِلك لجوزي المتوفي بس ولاده اللي من مراته الأولى أخدوا العقد ومهددني دايما بالطرد.

وعن مصاريف معيشتها قالت هدى: أنا بشتغل سواقة ميكروباص على خط الخانكة - المرج، وبنزل الشغل من بعد صلاة الفجر وأخلص على الساعة 2 الظهر، بس مذلولة لأصحاب العربيات عشان يشغلوني عندهم.

وأشارت السيدة هدى، أشهر سائقة ميكروباص في محافظة القليوبية، في حديثها إلى أن حالتها المادية كانت ميسورة قبل عدة سنوات، قائلة: أنا كان عندي محلات وعربية ملاكي وكانت ظروفي حلوة لحد 2011، والأحداث اللي حصلت في الكام سنة اللي بعدهم طلعوا عليا البلطجية من ناحية ومع ظروف البلد فضلت أخسر كل حاجة ورا التانية.

واستغاثت السيدة هدى بالرئيس عبدالفتاح السيسي والمسئولين، قائلة: أنا عايزة شقة أقعد فيها وأي شغلانة أكل منها عيش.