بعد أزمة اللحوم والممبار.. ردود أفعال زبائن مطعم بحه: الأكل والجودة زي الفل | بث مباشر
عبر مجموعة من زبائن مطعم بحّة عن رأيهم في المطعم، وذلك بعد أزمة اللحوم والممبار غير الصالحة للاستخدام الآدمي بفرع مطعم بحة بمدينة نصر.
وقال أحد الزبائن: الأكل في مطعم بحّة زي الفل وأنا وولادي بنيجي ناكل هنا بقالنا 20 سنة، وكنت باجي للمطعم من آخر الدنيا علشان آكل فيه وما صدقت فتح فرع هنا في مدينة نصر علشان أجيله على طول.
وأوضح أحد زبائن مطعم بحّة: بناشد الناس ميمشوش ورا الإشاعات اللي بتتقال على مطعم بحّه.. الأكل والجودة زي الفل، والشائعات اللي طالعة على المطعم كلها كذب، ومفيش أي غلط في الأكل وطعمه هنا أحسن من أي مطعم تاني.
وتابع: اللي شاكك في جودة الأكل وإنه المطعم نضيف يجي ويجرّب الأكل هنا هيعجبه جدا.
وفي وقت سابق كان تداول رواد مواقع التواصل الاجتماعي مقطع فيديو لشخص غير معروف، وأعلى الفيديو تعليق بأن هذا الشخص هو صاحب مطعم بحّه الشهير.
وقال هذا الشخص خلال الفيديو إن اللحوم المستخدمة داخل الكثير من المطاعم هي لحوم حمير، ليتبين فيما بعد أن هذا الشخص لا صلة له بمطاعم بحه.
ومن جانبه أكد أحد أحفاد صاحب محلات بحه أن ما ردده هذا الشخص غير صحيح، حيث قال: كميات الطعام اللي بنشتغل فيها بتصل إلى 700 أو 800 كيلو، هنجيب كل ده إزاي لو كلام مروج الفيديو ده صحيح.
وتابع: الشخص ده منعرفوش ولا ينتمي لأولاد بحه بأي صلة، وحررنا ضده محضر بالواقعة، والمطعم عمره 90 سنة، وإحنا ولاد الجيل التالت من أحفاد ميمي بحة وعمرنا ما نخسر سمعتنا ونعمل حاجة زي كده.
