مرتضى منصور: انتخابات الزمالك باطلة.. وحسين لبيب جاب 2000 بلطجي في الانتخابات | بث مباشر

حضر مرتضى منصور، رئيس نادي الزمالك السابق، اليوم الأحد، الدعاوى القضائية المقدمة ببطلان انتخابات نادي الزمالك.

وقال مرتضى منصور: اللي بيحصل في نادي الزمالك زي غزة بالظبط.. وطلعوا كلهم عيال نصابة، قالوا إنهم بقالهم 6 شهور بيجهزوا الملفات الخاصة بالتهرب من الضرائب وغيرها.. ولكن طلعوا كلهم نصابين.. فين بقى الملفات؟

وتابع مرتضى منصور: مفيش إجراءات سليمة بتمشي في نادي الزمالك، وكل إجراءات انتخابات الزمالك باطلة؛ لأنهم بلطجوا على أعضاء نادي الزمالك وضربوهم، وعلى لجنة الانتخابات.. رئيس لجنة الانتخابات كان في الفيديوهات بيقول يا حسين يا لبيب لو مطلعتش البلطجية اللي أنت جايبهم دول هوقف الانتخابات، ومطلعهومش.

وأضاف: حسين لبيب جاب 2000 بلطجي من الالتراس في انتخابات الزمالك.. عندي موظفة اسمها إيمان بتقول لرئيس اللجنة على المنصة: نجح دا دا غلبان صرف فلوس كتير.. بقول لحسين لبيب جتك خيبة.

وتابع مرتضى منصور: استبعدوا أكتر من 25 ألف من أعضاء النادي من التصويت في الانتخابات.. وازاي حسين لبيب أخد 15 ألف.. الانتخابات مزورة وكل المستندات مزورة.

واستكمل مرتضى منصور: حابب أقول لأهل غزة في ناس كتيرة معاكم، وربنا معاكم.. وأنا واحد من الناس اللي بعمل كل اللي أقدر عليه تجاههم.. وبقول لنتنياهو لو أطولك هقتلك، لإني سبق وبعتله تيليجراف رسمي وقت افتتاح السفارة الإسرائيلية بمصر: أنت جاي تلوث تراب مصر ولو أطولك هقتلك.