بطبخ بالسمن البلدي.. سيدة توزع وجبات طعام احتفالًا بمولد السيدة نفيسة: بقالي 35 سنة بخدم أهل البيت | بث مباشر

لفتة طيبة من السيدة راوية التي توزع وجبات طعام بالمجان على المحتاجين والفقراء احتفالًا بمولد السيدة نفيسة، حيث إنها تحرص في كل عام على المواظبة على هذه العادة الخيرية من أجل تقديم نفحة المولد.

سيدة توزع وجبات طعام احتفالًا بمولد السيدة نفيسة

وقالت السيدة راوية إنها وزعت وجبات الإفطار صباح اليوم على المحتاجين في منطقة السيدة نفيسة، والتي كانت مكونة من فطير وعسل وجبن، أما عن وجبة الغذاء فهي عبارة عن فتة عدس.

وأردفت: بقالي 35 سنة شغالة في خدمة أهل البيت.. وورثت العادة دي عن والدي وبتبقى حاجة جميلة لما بتقدم الخير لغيرك بتلاقي ربنا بيسعدك عن اللي عملته.

وأضافت السيدة راوية أنها تشتري المواد الغذائية اللازمة لها من أجل تقديم تلك الوجبات على حسب قدرتها المادية، لافتة إلى أن هناك بعض أهل الخير الذين يساعدونها في شراء احتياجاتها اللازمة لإعداد وتقديم نفحات الخير.

وتابعت: أحلى حاجة بسمعها من الناس لما يقولولي تسلم إيديكي يا حاجة وكل سنة وأنتي طيبة.. وأنا أصلًا من بنها والناس بتعيط عليا لما أمشي.. بس أنا بحرص إني أجي كل الموالد عشان أقدم نفحات الخير.

وأشارت السيدة راوية إلى أنها تحرص على إعداد وجبات الطعام بإتقان لتقديمها للمحتاجين في الموالد، مختتمة: أنا براعي ربنا في لقمة المسكين اللي بعملها حتى لو كانوا شوية عدس.. وبطبخ بالسمنة البلدي عشان اللي ياكل ميتعبش ويجي ياخد مني تاني.