أقوال زوجة إمام عاشور بواقعة التحرش بها في مول بالشيخ زايد: قالي إحنا في عيد وكله بيتعاكس| بث مباشر

أدلت ياسمين زوجة إمام عاشور، لاعب الفريق الأول لكرة القدم في النادي الأهلي، بأقوالها أمام جهات التحقيق في واقعة اتهام زوجها بالتعدي على فرد أمن في مول أركان بالشيخ زايد، وذلك بعد تعرضها إلى المعاكسة والمضايقة على يد مجموعة من الأشخاص داخل المول، وبالتحديد في يوم 19 يونيو الماضي 2024.

تصريحات زوجة إمام عاشور

وقالت زوجة إمام عاشور: اللي حصل إن يوم الأربعاء أنا كنت رايحة السينما مع أهلي وإخواتي وبعد شباك التذاكر من اليمين سمعت ناس ورايا بيقولوا دي مرات إمام عاشور شكلها.. وتعدوا عليا لفظيًا وتحرشوا بيا بألفاظ مش كويسة.. بعد كده سمعت حد بيقول للتاني تعالى وراها وطلعت على السلم الكهرباء وأخويا مشي معايا.

وتابعت: فضلوا ورايا وبيتريقوا وأنا مش مركزة بيقولوا إيه.. وأخويا مسكني من إيديا واستنيت باقي إخواتي عشان أخلي الناس اللي ضايقوني يعدوا الأول.

وأضافت زوجة إمام عاشور في التحقيقات: لما أخويا الكبير جه روحنا وقفنا عند الراجل بتاع التذاكر وأخدنا التذاكر والشباب دي فضلت واقفة يبصوا علينا ويضحكوا.. ولما دخلنا القاعة مبصتلهومش وقعدوا يقولوا دي مرات إمام عاشور ويتحرشوا بيا.. وسمعت واحد بيقول هروح أزقك عليها وأصورك ودخلت جوه السينما وكلمت إمام جوزي وأنا في السينما وقولت له اللي حصل عشان يتصرف.

وأردفت: أخويا معاذ كان متعصب وإمام كلمه ومعاذ حكى له على اللي حصل.. وإمام قاله متعملوش حاجة وبعد السينما روحوا قولوا لمشرفين الأمن وقال لأخويا إنه جاي عشان يعمل محضر.. ولما خلصنا سينما طلعت أنا وأهلي وأخويا معاذ الصغير قال لأخويا عمر الكبير هما دول.

واستكملت زوجة إمام عاشور: عمر قالهم انتوا عاكستوا اختي وكان معاكم واحد بجلابية وقعدوا يضحكوا ويتريقوا.. وبعدها بتاع الأمن جه وسألنا في إيه وعمر أخويا قاله إن فيه شباب اتحرشوا بيها وشتموها.. ومشرف الأمن قاله عادي باستهزاء كل الناس بيحصلها كده إحنا في عيد.