فتاة تعمل دليفري بالأقصر: شايلة مسؤولية وعاوزة أكلها بالحلال.. ورديت على انتقادات الناس بشغلي | بث مباشر
قصة كفاح جديدة بطلتها فتاة من محافظة الأقصر تدعى إيمان رجب، الشهيرة بـ توتا، والتي تحدت عادات وتقاليد الصعيد وقررت أن تعمل دليفري على موتوسيكل؛ وذلك بحثًا عن لقمة العيش الحلال لتوفير مصدر رزق أساسي لها.
قصة كفاح فتاة تعمل دليفري بالأقصر
وقالت إيمان رجب إنها عملت في أكثر من وظيفة خلال السنوات الماضية، إلا أنها فكرت أن تعمل دليفري لتوصيل الطلبات من أجل توفير مصدر رزق يومي لها.
وأضافت: أنا مش بخاف من حاجة بس فيه ناس كتير انتقدتني أول ما بدأت أشتغل على الموتوسيكل.. بس أنا محطتش في دماغي الموضوع ده وكملت في شغلي وحياتي زي ما أنا عايزة.
وأوضحت إيمان رجب أنها تعلمت قيادة الموتوسيكل بمفردها دون مساعدة من أي شخص، قائلة: كانت أمنية حياتي من وأنا صغيرة أسوق موتوسيكل واتعلمت لوحدي.
وأشارت إلى أنها واجهت العديد من الانتقادات في بداية عملها لأنها فتاة وتقود موتوسيكل في إحدى محافظات الصعيد، ما يعتبر ذلك مخالفًا للعادات والتقاليد المتعارف عليها.
واستكملت: الناس انتقدوني وإزاي بنت تركب موتوسيكل.. بس محدش فاهم حاجة محدش عارف أني شايلة مسؤولية بيت وقايمة بدور راجل ولازم أعمل كده.. وعاوزة أكلها بالحلال عشان أتحمل المسؤولية.
ولفتت إيمان رجب إلى أنها قررت أن تواجه الحياة بقوة بحثًا عن لقمة العيش الحلال، موضحة أن والدتها منفصلة عن والدها منذ أن كانت حامل بها، لذلك فهي متحملة المسؤولية منذ أن كانت صغيرة.
واختتمت: أمي مش معاها غيري وأنا اللي قايمة بالبيت كله.. بشتغل في أي حاجة ومش بقعد في البيت عشان مستسلمش للحياة والظروف.
