سائق ميكروباص معدية أبو غالب: نزلت أعاتب شباب كانوا بيعاكسوا البنات فلقيت العربية غرقت| بث مباشر

حصل القاهرة 24 على نص التحقيقات في قضية معدية أبو غالب، والتي وقعت خلال شهر مايو الماضي، وتوفيت فيها 17 فتاة وسيدة داخل الميكروباص، حيث غرقوا جميعا في مياه النيل.

وقال المتهم، البالغ من العمر 22 عاما،: اللي حصل إن أنا كنت سايق عربيتي ومحمل فيها 26 بنت من العمالة، وواخدهم من المنوفية ورايح بيهم يشتغلوا في محطة تعبئة وتصدير فواكه، بمطلع الثروة الخضراء في قرية أبو غالب.

اعترافات سائق ميكروباص معدية أبو غالب

وأضاف سائق ميكروباص معدية أبو غالب: وأنا معدي بالعربية من على معدية محطة أبو غالب والبنات راكبين في العربية كان فيه شباب في المعدية بيعاكسوهم من شباك العربية، وهما معديين من جنبنا فأنا نزلتلهم من العربية علشان أرد عليهم وأعاتبهم وعربيتي كانت آخر عربية في الصف وأقرب عربية للمياه.

وواصل سائق ميكروباص معدية أبو غالب خلال التحقيقات: العيال دول مسكوا في هدومي وحصلت بينا مشادة والعربية اتهزت فاتحركت من مكانها، وريحت واحدة واحدة، لحد ما وقعت في البحر وأنا حاولت أجري وراها ألحقها بس معرفتش لحد ما وقعت بحالها والبنات غرقوا.

واستكمل: وأنا بعد الحادثة فضلت واقف في مكاني وأشوف مين اللي طلع ومين اللي مطلعش ومرضتش أتحرك من مكاني، لحد ما قوات الشرطة نزلت المكان وسألوني هو أنت سواق الميكروباص قلتلهم أيوة، وخدوا مني البطاقة وقالولي استني معانا شوية وفضلت واقف معاهم هناك وبعدها خدوني المركز وقعدت هناك شوية وبعدين عملولي محضر وجابوني النيابة وده كل اللي حصل.