شاب يبحث عن أسرته منذ 12 عامًا: اتربيت في دار أيتام وحلم حياتي أقابل أهلي | بث مباشر

استغاث شاب يدعى علي فوزي، متربي في دار الهدى لرعاية الأيتام في طنطا، لإيجاد أهله وعائلته، حيث يبحث عنهم منذ 12 عاما.

وقال الشاب علي فوزي: أنا بدور على أهلي من وأنا في الصف السادس الابتدائي، ولما تميت السن القانوني 18 سنة الدار قالولي لازم أمشي، وبعد ما مشيت معرفتش أروح فين، واتبهدلت على ما أجرت أوضة.

وأضاف الشاب علي أن كل ما يتمناه هو أن يجد أهله وعائلته، مضيفا: الموضوع تعبني نفسيا وبقيت بتمنى الموت بسبب إني مليش أهل ولا حد يسأل عني.. حتى لما بقيت أتمنى الموت بقيت أقول لنفسي مين هيدفني وهيصلي عليا أو هدفن فين.

وواصل الشاب علي فوزي أنه عندما استغنت عنه دار الأيتام لم يجد أمامه مكانا يعيش فيه سوى تحت الكوبري، مضيفا: بنيت ليا أوضة تحت الكوبري وقعدت فيها 6 شهور، وكنت لما بعوز أكل وأشرب بروح الملجأ كانوا بيجيبولي أكل.. وبعدها اشتغلت في كافيتريا مقابل نومتي ومكنتش باخد فلوس.. أنا بتمنى إني ألاقي أهلي، مش باكل غير من أكل الشارع، نفسي أكل بيتي، ونفسي أعيش حياة كريمة، ونفسي إما أشتغل يدوني راتب.. ناس عرضت عليا أشتغل في المخدرات والسرقة، ونفسي في شغلانة كويسة، ونفسي أبقى زي بني آدم سوي نضيف.